Frá Alþingi. Golli / Kjartan Þorbjörnsson

Þingmaður Sjálfstæðisflokksins sagði á Alþingi í dag, að ummæli þingflokksformanns Samfylkingarinnar um árangur ríkisstjórnarinnar minntu sig á blaðafulltrúa Saddams Husseins, sem lýsti í sjónvarpsviðtali fjálglega sigrum íraska hersins en í baksýn sáust bandarískir skriðdrekar í Bagdad.

Oddný G. Harðardóttir, þingmaður Samfylkingarinnar, sagði á Alþingi í dag að ríkisstjórn Jóhönnu Sigurðardóttur hefði ekki lokið ætlunarverki sínu að reisa Ísland upp úr hruni efnahagslífs og samfélags en það verk væri komið vel á veg. Hún sagði m.a. að árangur hefði náðst í ríkisfjármálum sem tekið væri eftir, lokið yrði breytingum á fiskveiðikerfinu, endurskoðun stjórnarskrár væri komin vel á veg, lokið yrði aðildarviðræðum við ESB, atvinnulíf eflt og unnið gegn atvinnuleysi.

Guðlaugur Þór Þórðarson, þingmaður Sjálfstæðisflokksins, sagði að ræða Oddnýjar hefði verið áhugaverð þegar hún lýsti dásemdum ríkisstjórnarinnar.

„Ég man eftir svona ræðu. Hún var flutt í beinni útsendingu í fréttatíma af blaðafulltrúa Saddams Husseins sem lýsti því að íraski herinn væri algerlega að taka Bandaríkjamenn í gegn. Í baksýn voru skriðdrekarnir sem voru að fara inn,“ sagði Guðlaugur.

Þingmenn kölluðu nú til Guðlaugs og heyrðist hrópað „þvílík smán“ og „skammastu þín“.

Nokkru síðar kom Guðlaugur Þór að nýju í ræðustól og sagðist að gefnu tilefni vilja lýsa þvi yfir að ekki hefði átt að skilja orð hans þannig, að hann væri að bera saman stjórnarliða á Alþingi og ógnarstjórn Saddams Husseins. Sagðist hann biðjast afsökunar ef einhverjir hefðu skilið orð hans þannig og að hann vonaði að sú afsökunarbeiðni yrði tekin til greina.

Árni Þór Sigurðsson þingmaður sagðist telja að ummæli Guðlaugs Þórs hefðu verið smánarleg og forseti þingsins hefði átt að gera við þau athugasemd. Sérstaklega vegna þess, að hópur fólks frá Palestínu, sem hefði búið við ógnarstjórn Saddams, væri á þingpöllum Alþingis í dag. Guðlaugur Þór væri þó maður að meiri að hafa beðist afsökunar.

Gunnar Bragi Sveinsson, þingmaður Framsóknarflokksins, sagðist telja ræðu Árna Þórs algerlega ómaklega. Guðlaugur Þór hefði ekki verið að líkja neinum við neinn.