Varla sást á milli húsa á Akureyri í morgun Vefur Þorgeirs Baldurssonar

Víkurskarðið er enn lokað en þar hefur flutningabíll setið fastur síðan snemma í morgun. Allur akstur er bannaður um Ólafsfjarðarmúla vegna snjóflóða. Þungfært og stórhríð er milli Akureyrar og Dalvíkur, ófært og stórhríð á milli Akureyrar og Grenivíkur og beðið er með mokstur.

Í ábendingu frá veðurfræðingi Veðurstofunnar kemur fram að áfram verður hríðarveður og snjókóf víðast á Norðurlandi, en veður tekur að lagast mikið á Vestfjörðum þegar líður á daginn og upp úr miðjum degi einnig við Húnaflóann.

Það eru hálkublettir á Hellisheiði og í Þrengslum. Hálka, hálkublettir eða snjóþekja er á Suðurlandi og Reykjanesi.

Á Vesturlandi er hálka og skafrenningur. Á Vestfjörðum er mokstur hafinn í Ísafjarðardjúpi og á Steingrímsfjarðarheiði, hálka, snjór og skafrenningur er á öllum leiðum.

Á Norðvesturlandi er hálka og skafrenningur. Mokstur er hafinn á Þverárfjalli. Þæfingur og skafrenningur er með ströndinni til Siglufjarðar.

Á Norðausturlandi er víða stórhríð og hálka eða snjóþekja. Á Austurlandi er hálka eða snjóþekja á flestum leiðum, þæfingsfærð og skafrenningur er á Öxi. Á Suðausturlandi er víða hálka.

Á vef Þorgeirs Baldurssonar er að finna myndir frá Akureyri í morgun