Flugfélög bjóða upp á sérstök jólagjafabréf mbl.is/Ernir Eyjólfsson

Það er vinsælt að gefa gjafabréf í jólagjöf en miðað við þann fjölda gjafabréfakvartana sem Neytendasamtökin fá er rétt að fara varlega í sakirnar. Nær allar kvartanirnar snúast um að seljendur meini viðskiptavinum sínum að nýta gjafakort vegna þess að gildistíminn sé útrunninn. Neytendasamtökin telja að gildistíminn ætti að vera 4 ár, sem er almennur fyrningarfrestur á kröfum. Þetta kemur fram í grein á vef Neytendasamtakanna.

Það hefur tíðkast að flugfélög bjóði sérstök jólagjafabréf. Það sem einkennir þau er að bókunartíminn er takmarkaður og það sama á við um ferðatímabilið. Þá er sætaframboð einnig takmarkað. Ef ferðin er ekki farin á því tímabili sem skilmálarnir segja til um breytist jólagjafabréfið í hefðbundið gjafabréf eða inneign.

„Hjá Icelandair er gildistíminn aðeins eitt ár, sem verður að teljast alltof stutt og hjá Iceland Express er hann tvö ár. Neytendasamtökin fá oft kvartanir vegna þessara gjafabréfa sem í sumum tilfellum nýtast afar illa. Helstu kvartanir eru þær að fólk hefur ekki getað nýtt bréfið innan tilskilins ferðatíma og situr uppi með inneignarnótu sem hefur afar stuttan gildistíma. Þá hefur takmarkað sætaframboð jafnvel gert að verkum að fólk hefur ekki getað ferðast á þeim dögum sem því hentar," segir í greininni sem hægt er að lesa í heild hér