Ríkislögreglustjórinn fékk LEX lögmannsstofu til að vinna lögfræðiálit um ábendingar Ríkisendurskoðunar. Árni Sæberg

Heppilegra væri að fá annan en skipaðan ríkisendurskoðanda til að stýra rannsókn sem ríkisendurskoðandi hefur nú hafið á ráðstöfun fjármuna Ríkislögreglustjórans (RSL)  til þess að auka trúverðugleika rannsóknarinnar.

Þetta kemur m.a. fram í álits álitsgerð LEX lögmannsstofu sem unnin var vegna ábendinga Ríkisendurskoðunar um innkaup löggæslustofnana. Ríkislögreglustjóri hefur nú birt álitsgerðina og fylgir hún í viðhengi.

Meginniðurstöður LEX eru m.a. þær að ætla megi „að Ríkisendurskoðun hafi farið út fyrir lögbundið hlutverk sitt við rannsókn á því og ábendingu um hvort RLS hafi við innkaup farið að ákvæðum laga nr. 84/2007 um opinber innkaup.“

Einnig segir þar að verulegur vafi leiki á um að RLS hafi borið að bjóða út viðskipti sín við fyrirtækið Trademark ehf. Þá er það mat LEX að Ríkisendurskoðun sé ekki til þess bær að lögum „til að leggja mat á og endurskoða matskennda ákvörðun RLS um að neyðarástand hafi réttlætt undanþágu frá útboðsskyldu.“

Loks segir í samantektinni: „Þrátt fyrir efnislega niðurstöðu Ríkisendurskoðunar og ummæli ríkisendurskoðanda um að RLS hafi farið gegn lögum um opinber innkaup, verður að telja ólíklegt að það eitt og sér nægi til að ríkisendurskoðandi teljist vanhæfur til frekari afgreiðslu mála er tengjast RLS.

Þar sem ekki hefur verið skorið úr um ágreining RLS og Ríkisendurskoðunar um bærni síðargreindu stofnunarinnar til að meta lögmæti matskenndrar ákvörðunar RLS, verður þó að telja óheppilegt að skipaður ríkisendurskoðandi komi að meðferð áþekkra mála hvar ráðstöfun RLS á fjármunum er til sérstakrar skoðunar Ríkisendurskoðunar.

Heppilegra væri í því skyni að auka trúverðugleika rannsóknar þeirrar sem ríkisendurskoðandi hefur nú hafið að öðrum til þess hæfum einstaklingi yrði sérstaklega falið að stýra henni.“