mbl.is/Ómar

Rannsókn hófst í dag hjá embætti sérstaks saksóknara á níu málum, sem tengjast starfsemi Glitnis banka fyrir hrun. Samhliða er unnið áfram við rannsókn á svokölluðu Stím máli, en sú rannsókn hófst á síðasta ári. Handtökur og yfirheyrslur fóru í dag fram hjá embættinu vegna þessara mála.

Í tilkynningu frá embætti sérstaks saksóknara segir, að til rannsóknar sé eftirgreind háttsemi:

1. Kaup eigin viðskipta Glitnis á hlutabréfum útgefnum af bankanum á verðbréfamarkaðinum. Einnig kaup bankans og ráðstöfun á hlutabréfum útgefnum af FL Group.
2. Lánveitingar til ýmissa félaga vegna kaupa á hlutabréfum útgefnum af bankanum í lok árs 2007 og á árinu 2008. Upphaflegur höfuðstóll nefndra lánveitinga er talinn nema samtals tæpum 37 milljörðum króna.
3. Viðskipti með framvirka samninga í hlutabréfum útgefnum af bankanum.
4. Sölutrygging Glitnis á 15 milljarða hlutafjárútboði FL Group áramótin 2007 og 2008.

Til rannsóknar er grunur um meint brot á auðgunarbrotakafla hegningarlaga í tengslum við ráðstafanir á fjármunum bankans, brot á lögum um verðbréfaviðskipti, lögum um fjármálafyrirtæki, lögum um ársreikninga og lögum um bókhald.

Embættið segir, að um sé að ræða rannsóknir á fjölmörgum tilvikum og um háar fjárhæðir sé að tefla. Ljóst sé að yfirheyra þurfi allstóran hóp manna í tengslum við rannsóknirnar.

Málunum var vísað til embættis sérstaks saksóknara annarsvegar með kærum frá Fjármálaeftirlitinu og hinsvegar með tilkynningum frá slitastjórn Glitnis á þessu ári en málin hafa verið til meðferðar síðan.

Í morgun hófust yfirheyrslur yfir sakborningum og vitnum í málunum en ráðgert er að yfirheyrslur haldi áfram næstu daga. Alls tóku um 60 starfsmenn embættisins þátt í aðgerðunum í dag.