Hækkuð framlög duga ekki til að koma í veg fyrir skerðingu á þjónustu.. mbl.is/ÞÖK

Stjórnendur sjúkrastofnana og sveitarstjórar, sem Morgunblaðið ræddi við í gær, eru ekki alls kostar sáttir við tillögur fjárlaganefndar þó að framlög til stofnananna hækki frá því sem var í fjárlagafrumvarpinu. Hækka framlögin samanlagt um rúmar 390 milljónir króna, þar af um 140 milljónir til Landspítalans.

Í fréttaskýringu um mál þetta í Morgunblaðinu í dag telja stjórnendur, að aðeins sé um plástur á sárið að ræða, enga alvörulækningu á þeim vanda sem við blasir í þjónustu þessara stofnana. Þó að framlögin hafi eitthvað verið hækkuð dugi það ekki nema að litlu leyti til að koma í veg fyrir skerðingu á þjónustu og uppsagnir starfsfólks.

Þannig bárust strax fregnir af því í gær að Heilbrigðisstofnun Suðurlands á Selfossi hefði ákveðið að sameina heilsugæsluþjónustu í Rangárþingi og loka heilsugæslustöðinni á Hellu. Þarf stofnunin að minnka útgjöld um 5,5% eða um 120 milljónir króna.

Innan Landspítalans eru þungar áhyggjur af áhrifum frekari niðurskurðar á starfsemi sjúkrahússins. Tæki eru orðin úrelt, loka hefur þurft deildum og ekki hægt að kaupa nýjustu gerðir lyfja. Mættu margir starfsmenn til þögulla mótmæla á þingpöllum Alþingis í gær.