Fréttaskýring: Stefna að því að stokka upp í ríkisstjórn fyrir árslok
Ríkisstjórnin á fundi. mynd/bb.is
Kristján Jónsson kjon@mbl.is
Líklegt er nú talið að þau Jóhanna Sigurðardóttir forsætisráðherra og Steingrímur J. Sigfússon fjármálaráðherra muni fyrir árslok skýra frá uppstokkun í ríkisstjórn en varla fyrr en eftir að afgreiðslu fjárlaga er lokið. Stefnt er að því að það verði 7. desember.
Hluti af þessari uppstokkun mun verða brotthvarf Jóns Bjarnasonar sjávarútvegsráðherra og ef til vill fleiri ráðherra, að sögn heimildarmanna. En ekki er víst að það gangi eftir án hávaða.
Hætti Jón að styðja stjórnina ef hann verður látinn víkja er þingmeirihlutinn fallinn. En bent er á að Guðmundur Steingrímsson, sem var framsóknarmaður en er nú utan flokka, hafi áður lýst því yfir að hann myndi verja ríkisstjórnina falli ef borin yrði upp vantrauststillaga.
Stuðningsmenn Jóns eru byrjaðir að safna yfirlýsingum og undirskriftum um stuðning við áframhaldandi ráðherradóm hans. Þetta staðfesti Anna Ólafsdóttir Björnsson, sem er liðsmaður VG á Álftanesi og fyrrverandi þingmaður Kvennalistans, í gær í samtali við mbl.is. „Ef einhver er að reyna að koma honum frá er það út af ESB-málunum,“ sagði Anna og bætti við að hún styddi þá viðspyrnu sem Jón hefði sýnt í þeim málum. Stuðningsmenn Jóns hyggjast einnig birta auglýsingar í fjölmiðlum, að sögn heimildarmanna.
Ráðamenn flokksins, einkum Steingrímur, sættu í gær harkalegri gagnrýni eigin flokksmanna fyrir að taka ekki upp hanskann fyrir Jón, nú þegar samfylkingarmenn reyndu að bola honum úr stjórn. Steingrímur sagði eftir ríkisstjórnarfund í gær að líklegt væri að breytingar yrðu á stjórninni áður en kjörtímabilið væri á enda 2013.
Stuðningur við Jón
Bæði Guðfríður Lilja Grétarsdóttir, þingmaður Vinstri-grænna, og Ögmundur Jónasson innanríkisráðherra sögðust í gær styðja Jón Bjarnason. „Hann hefur staðið manna mest á þeirri grunnstefnu Vinstri-grænna að hafna aðild að Evrópusambandinu og er lykilmaður í þeim efnum innan VG. Það væri náttúrlega gríðarlegt áfall fyrir Vinstrihreyfinguna – grænt framboð ef hún ætlaði nú að snúa baki við þessum ráðherra,“ sagði Guðfríður Lilja.
