Húsið fylltist af reyk og mikið vatn barst inn í bókabúð Eymundsson sem er á fyrstu hæð hótelsins. Eyjafréttir/Júlíus G. Ingason

Tjón Eymundsson vegna skemmda af völdum eldsvoða í Vestmannaeyjum í nótt gæti numið um 40 milljónum, að mati Ingþórs Ásgeirssonar, framkvæmdastjóra verslunarsviðs Eymundsson. Kapp er lagt á að opna nýja búð í Eyjum sem fyrst. 

Ingþór sagði gert ráð fyrir að allar vörur, tæki og innréttingar vær ónýtar. Eymundsson var með bókaverslun, kaffihús og rak einnig afgreiðslu fyrir Símann á jarðhæð Drífanda. Hótel Eyjar var á efri hæðum hússins. Þar braust út eldur um klukkan þrjú í nótt.

Húsið fylltist af reyk og mikið vatn barst niður í bókabúðina.

„Við gerðum ráðstafanir í morgun til að endurpanta vörur í nýja verslun. Við erum að leita að húsnæði og það er ýmislegt í deiglunni,“ sagði Ingþór. Hann sagði stefnt að því að opna verslun á nýjum stað eftir örfáa daga.

Nú þegar er komið fólk á vegum Eymundsson til Eyja að sinna fyrirtækjum með rekstrarvörur og verður haldið uppi fullri þjónustu við fyrirtækin í Eyjum. Þá verður reynt að opna bókabúðina svo fljótt að Vestmannaeyingar fari ekki á mis við þjónustu. Búið er að færa verslun Símans sem var í Eymundsson í raftækjaverslunina Geisla.

Ingþór sagði að samkvæmt lauslegu mati hefðu verið birgðir í búðinni að andvirði 20-30 milljónir. Þá var þar kaffihús með húsbúnaði og tækjum. Húsnæðið var nýlega tekið í gegn og gólfefni, innréttingar, lýsing og rafmagn endurnýjað. 

„Þetta er svolítið stórt tjón fyrir okkur því þetta var svo nýtt,“ sagði Ingþór. „Þetta var stórglæsilegt húsnæði og vel staðsett. Uppsetningin og umgjörðin þannig að hún hæfði þessari verslun mjög vel með kaffi, bækur og tímarit. Þetta var orðinn samkomustaður í bænum.“

Að öllu samanlögðu áætlaði Ingþór að tjónið gæti verið nálægt 40 milljónum króna. Hann sagði að byrjað væri að skoða málið í samvinnu við tryggingafélag.

„Við finnum mikinn velvilja hjá Vestmannaeyingum og það eru allir boðnir og búnir að aðstoða okkur,“ sagði Ingþór.