Páll Óskar Hjálmtýsson. mbl.is/Sigurjón Guðjónsson

Í tilefni af degi rauða nefsins 9. desember næstkomandi hafa Páll Óskar Hjálmtýsson og lagahöfundarnir í Redd Lights sent frá sér lagið „Megi það byrja með mér“.

Lagið hefur þegar vakið mikla athygli og meðal annars fengið mikla hlustun á YouTube. Páll Óskar samdi textann við lagið eftir að hafa heimsótt Síerra Leóne ásamt UNICEF. Eins og hann segir sjálfur: „Ég fékk að fara til Afríku með UNICEF um daginn, og ég kom ekki sami maður til baka.“ Í textanum óskar hann þess að heimurinn verið betri staður og ítrekar þá sannfæringu sína að hver og einn geti lagt sitt af mörkum til þess að svo megi verða. Það sé sannarlega hægt að hjálpa börnum sem búa við sára fátækt og neyð – lykillinn sé hjá okkur sjálfum.  Hlekk á lag og texta auk frekari upplýsinga um UNICEF og dag rauða nefsins er að finna á heimasíðu UNICEF, www.unicef.is  

Dagur rauða nefsins fer fram föstudaginn 9. desember næstkomandi og er landssöfnun fyrir UNICEF (Barnahjálp Sameinuðu þjóðanna). Í tilefni dagsins eru landsmenn hvattir til að setja upp rauð nef til styrktar UNICEF og horfa á metnaðarfullan skemmti- og söfnunarþátt í opinni dagskrá á Stöð 2, þar sem meðal annars koma fram Þorsteinn Guðmundsson, Ilmur Kristjánsdóttir, Gunnar Hansson, Ólafía Hrönn Jónsdóttir, Katla Margrét Þorgeirsdóttir, Ugla Egilsdóttir, Kjartan Guðjónsson, Bergur Þór Ingólfsson, Freyr Eyjólfsson, Björn Bragi og Þórdís Nadia Óskarsdóttir. Þá er einungis brot af öllu fólkinu upp talið.