Bæjarins bestu pylsur er sá veitingastaður sem Mitchell telur fyrst upp í lista yfir veitingastaði í Reykjavík. mbl.is/Árni Sæberg

Reykjavík er mjög líklega „besta partíið í Evrópu“, að mati blaðamannsins Shane Mitchell. Hún á varla orð til að lýsa hrifningu sinni í grein sem birtist á vef ástralska ferðatímaritsins Gourmet Traveller.

Mitchell hefur augljóslega hrifist mjög af Íslandi og telur það vera mjög „svalt“ og ekki bara í veðurfarslegu tilliti. Hún áttar sig ekki á því hvort það er ýkt landslagið eða erfðasamsetningin sem veldur því að Reykjavík er ótvírætt miðpunktur óheftrar sköpunargleði.

Blaðamaðurinn fjallar mikið um matarmenningu Íslendinga og gerir grein fyrir mörgum veitingastöðum í Reykjavík. Eins og vænta má minnist hún á hvalkjötið, kæsta hákarlinn og hreindýrakjöt. En fleira vakti athyglina, bæði fæði og klæði.

„Pylsurnar bragðast öðru vísi (þær eru búnar til úr lambakjöti). Smáverslanir selja rómantískan ullarfatnað - peysur, vettlinga, samkvæmiskjóla - sem búinn er til úr ofurhlýrri íslenskri ull. Meira að segja síðu ullarnærbuxurnar eru kynþokkafullar.“

Shane Mitchell hefur áður skrifað mjög lofsamlegar greinar um Ísland sem birst hafa í útbreiddum erlendum tímaritum um ferðir og sælkeramat. Þar má nefna tímarit á borð við Gourmet, Travel and Leisure, Food and Wine auk Gourmet Traveller.