Makríll.

Krafa útgerða makrílbáta í Noregi og í Evrópusambandinu um að Íslendingar fái að mesta lagi að veiða fjögur prósent af sameiginlegum makrílkvóta er fáránleg. Þetta segir Guðmundur Kristjánsson, forseti Brims. Það jafngildi afsali á sjálfstæði þjóðarinnar að samþykkja þá kröfu.

Á fréttavef norskra útvegsmanna Fiskebåt kemur fram að útgerðir makrílbáta í Noregi og Evrópusambandinu geti sætt sig við það að Íslendingar veiði í mesta lagi 4% af sameiginlegum makrílkvóta í NA-Atlantshafi og Færeyingar 7%.

„Þetta er alveg fáránleg krafa Norðmanna og ESB um það að banna Íslendingum að veiða í sinni lögsögu. Nú var gríðarlegt magn af makríl hér í fyrra og stofninn át yfir milljón tonn af fæðu bara í okkar lögsögu síðasta sumar. Haldi hann áfram að koma í þessum mæli mun það hafa áhrif á allt lífríkið. Ef Íslendingar ætla að afsala sér réttinum að nýta sína fiskveiðiauðlind er illa komið fyrir okkar þjóð,“ segir Guðmundur.

Hann segir það ótrúlegan yfirgang Norðmanna og ESB að banna Íslendingum að nýta eigin fiskimið. Það jafnist á við að afsala sér sjálfstæði þjóðarinnar að ganga að kröfum þeirra.

Ekki sé hægt að semja um veiðarnar núna því að ekki sé vitað hvaða magn af makríl komi inn í íslenska lögsögu næsta sumar. Íslenskir sjómenn telja að makríllinn sé farinn að hafa vetursetu við Ísland og hann sé nánast hættur að ganga inn í lögsögu Noregs.

Fráleitar hugmyndir segir LÍÚ

Landssamband íslenskra útvegsmanna hefur sent frá sér tilkynningu þar sem hugmyndir um að Íslendingar fái aðeins 4% makrílkvótans eru sagðar fráleitar og ekki í neinu samræmi við kröfur um réttmæta hlutdeild úr stofninum. Undanfarin ár hafi hlutur Íslendinga í heildarveiðinni verið 16-17%.

Vaxandi makrílgegnd inn í íslenska lögsögu hafi verið staðfest með veiðum og viðamiklum sameiginlegum rannsóknarverkefnum íslenskra, færeyskra og norskra vísindamanna. Þannig hafi um 1,1 milljón tonna mælst innan íslensku lögsögunnar í rannsóknarleiðangri sem farinn var í sumar. Það sé svipað magn og mældist í sambærilegum leiðangri árið áður að því er segir í tilkynningu LÍÚ.

Íslendingar fái 4% makrílsins.