mynd/eimskip.is

Verðmæt íslensk nútímalistaverk eyðilögðust þegar ólag reið yfir flutningaskip Eimskips milli Íslands og Bandaríkjanna í vor. Íslenska ríkið þurfti að greiða 75 milljónir króna í bætur fyrir verkin sem listfræðingar segja ómetanleg. Þetta kom fram í fréttum Sjónvarpsins í kvöld.

Tjónið varð þegar búslóð Skafta Jónssonar sendiráðunautar og eiginkonu hans Kristínar Þorsteinsdóttur var flutt frá Reykjavík til Richmond í Virginíuríki í Bandaríkjunum í apríl á þessu ári. Búslóðin var flutt í gámi og skemmdist öll þegar sjór flæddi inn í gáminn í aftakaveðri við suðurodda Grænlands. Gámurinn var neðst í lest skipsins og hálffylltist af vatni. Eftir að honum var landað vestanhafs stóð hann lokaður á hafnarbakkanum í Richmond í 40 stiga hita og sól í nokkra sólahringa áður en hann var tollafgreiddur og opnaður. Þá fyrst kom tjónið í ljós. Verðmæt húsgögn og listaverk reyndust þá gegnsósa, mygluð, ónýt og skemmd. 

Fréttastofa Sjónvarpsins hefur heimildir fyrir því að í gámnum hafi verið merk íslensk og erlend nútímaverk auk verka sem Kristín erfði eftir föður sinn, Þorstein Ólafsson tannlækni, en hann átti mikið safn íslenskra málverka. 

Listfræðingar sem fréttastofa ræddi við segja að mikið menningarlegt slys hafi orðið. Þarna voru merk málverk, ljósmyndaverk, skúlptúrar og önnur verk unnin með ýmsum aðferðum eftir listamennina Roni Horn, Hörð Ágústsson, Hrein Friðfinnsson Birgi Andrésson og fleiri.