Lögreglan rannsakar nú mál þar sem reynt var að lokka níu ára dreng upp í bíl.

Karlmaður um þrítugt reyndi að lokka níu ára dreng inn í bíl til sín við leikskólann Gullborg í Reykjavík í gær. Var Lögreglunni á höfuðborgarsvæðinu tilkynnt strax um atvikið  og tekur hún það föstum tökum að sögn varðstjóra, enda um alvarlegt mál að ræða og ekkert líkt því komið fram í langan tíma.

Maður fór út úr rauðum bíl sem hann var á og veitti drengnum eftirför. Drengurinn hóf þá að hlaupa og maðurinn hljóp þá á eftir honum að göngustíg við Seilugranda þar sem hann hætti eftirförinni. Maðurinn sagði ekkert við piltinn en hann var svarthærður og með svarta skeggbrodda og klæddur í rauða hettupeysu.

Í byrjun haustsins bárust margar tilkynningar til lögreglunnar um menn sem reyndu að lokka börn upp í bíla. Lítið kom út úr þeim málum. Ekki hefur verið mikið um slíkar tilkynningar frá því í haust til Lögreglunnar á höfuðborgarsvæðinu.