Verða að fara að ákæra

Eva Joly
Eva Joly Reuters

Fyrstu ákærur frá embætti sérstaks saksóknara á hendur þeim sem urðu til þess að íslenska bankakerfið féll saman verða að fara að líta dagsins ljós segir Eva Joly, fyrrverandi ráðgjafi sérstaks saksóknara. Þetta kemur fram á vef RÚV en Eva Joly verður gestur Egils Helgasonar í Silfri Egils í dag.

Joly segir það hafa tekið langan tíma að rannsaka mál sem tengjast bankahruninu og þeim efnahagslegu hamförum sem riðu yfir Ísland í október árið 2008 og því sem gerðist í aðdraganda þess. Fleiri en ein ákæra ætti að hafa litið dagsins ljós.

Hún segist hlakka til að sjá fyrstu ákærurnar sem komi frá embætti sérstaks saksóknara á hendur þeim sem báru ábyrgð á hruninu. Ferlið allt og uppgjör bankahrunsins hér á landi geti verið mikill og góður lærdómur fyrir heiminn allan. Gríðarlega mikilvægt sé að fara ofan í saumana á því sem hér gerðist, varpa ljósi á það og draga menn til ábyrgðar.

Joly segir mikilvægt að Ólafur Þór Hauksson, sérstakur saksóknari, gefi út ákærur fyrr en síðar. Hún sýni því skilning að rannsóknir málanna taki langan tíma en nú séu liðin þrjú ár og engin ákæra á hendur gerendum hrunsins hafi litið dagsins ljós.
Ekkert samfélag eigi að líða það að menn komist upp með að setja bankakerfi heillar þjóðar á hliðina og sleppa við alla ábyrgð. Það sé afar slæmt fordæmi.

mbl.is
Fleira áhugavert
Fleira áhugavert