Litla Hraun. mbl.is/Ómar Óskarsson

Þriðja umræða um fjárlagafrumvarp fyrir næsta ár stendur enn yfir á Alþingi og eru fimm þingmenn á mælendaskrá. Meðal þeirra sem tóku til máls var Illugi Gunnarsson, þingmaður Sjálfstæðisflokks, sem sagði óviðunandi að fjárlaganefnd væri sett í þá stöðu að taka faglega ákvörðun um fangelsismál.

Illugi sagði fjárlaganefnd ekki hafa neinar forsendur til að meta faglega hvers konar fangelsi skyldi byggt eða hvar það ætti að byggja. Hann sagði ástæðuna fyrir því að fjárlaganefnd hefði verið sett í slíka stöðu þá að óeiningin sem ríkti innan stjórnarflokkanna væri þannig úr garði gerð, að hver og einn þingmaður hefði alræðisvald. Það væru ekki eðlileg vinnubrögð að fjárlaganefnd þyrfti að skera úr um byggingu fangelsis.

Björn Valur Gíslason, þingflokksformaður Vinstri grænna og varaformaður fjárlaganefndar, var til andsvara og sagðist hafa gleymt því hversu skemmtilegt væri að hlusta á ræður Illuga. Ræðan hefði þó því miður ekki verið jafn góð og flutningurinn.

Björn benti á að fangelsismálin væru nú varla nýtt mál sem ríkisstjórnin væri að takast á við. Það væri áratuga gamalt mál sem dómsmálaráðherrum Sjálfstæðisflokks hefði ekki tekist að koma í gegn. Þá sagði hann að það væri þó alla vega eitthvað að gerast í því núna og vonaðist eftir atkvæði Illuga.

Jafnframt gagnrýndi Björn Valur að Illugi hefði getað farið í gegnum heila ræðu án þess að nefna eitt einasta jákvætt atriði við fjárlagafrumvarpið.

Illugi sagðist hrósa ríkisstjórninni um leið og hann yrði ánægður með hana. Þá sagðist hann hafa áhyggur af því að of hægt gengi að vinna á atvinnuleysinu. Of margir gengju um atvinnulausir og hefðu enga von um að fá atvinnu í nánustu framtíð. Þá gæti hann ekki hrósað ríkisstjórn sem hefði haldið þannig á málum að forseti ASÍ segði að verið væri að neyða þá til að segja upp kjarasamningum, yrði fjárlagafrumvarpið samþykkt.

Bein útsending frá Alþingi