Teikning af fyrirhuguðu fangelsi á Hólmsheiði.

Allsherjar- og menntamálanefnd sat í morgun upplýsingafund um byggingu nýs fangelsis í kjölfar þeirrar tillögu fjárlaganefndar að veita fé til framkvæmda við nýtt fangelsi á Hólmsheiði. Óvíst var hvort stuðningur væri við það á Alþingi að leggja Fangelsisstofnun til um 200 milljónir á fjárlögum næsta árs vegna framkvæmdanna.

Fangavarðafélagið og Jón Magnússon, fulltrúi innanríkisráðuneytisins, veittu allsherjar- og menntamálanefnd upplýsingar um framkvæmdirnar. 

Stendur til að nota féð, 200 milljónir króna, til að hefja hönnun og undirbúning vegna nýs fangelsis af fullum krafti.

Fréttavefur Morgunblaðsins ræddi í gær við Ögmund Jónasson innanríkisráðherra og lýsti hann þá yfir ánægju með þá tillögu meirihluta fjárlaganefndar Alþingis að fé yrði veitt á næsta ári til þess að mæta hönnunarkostnaði við byggingu nýs fangelsis og ennfremur að fé yrði veitt til endurbóta og framkvæmda vegna fangelsisins á Litla-Hrauni.

Lengi hefur legið fyrir að bæta þarf húsakost fangelsanna. Hátt í 400 manns eru á boðunarlista og fyrir löngu átti að vera búið að loka báðum fangelsunum á höfuðborgarsvæðinu, kvennafangelsinu í Kópavogi og Hegningarhúsinu við Skólavörðustíg. Raunar hefur Hegningarhúsið verið rekið á undanþágum í mörg ár.

Lesa má fréttaskýringu Rúnars Pálmasonar blaðamanns um fangelsismálin hér.