Varðskipið Þór á siglingu. mbl.is/Ómar

Landhelgisgæslan fylgdist grannt með 40.000 tonna tankskipi sem lónaði um 40 sjómílur austur af Stokksnesi frá föstudegi til þriðjudags. Gæslan segir að full ástæða hafi verið til að fylgjast vel með skipinu, sem hafi verið með viðkvæman farm um borð.

Skipið er nú komið út úr íslensku efnahagslögsögunni.

Fram kemur á vef Gæslunnar að skipið heiti St. Heritage og sé olíuskip sem sé skráð á Marshall-eyum. Það hafi verið að sigla með fullfermi frá Murmansk í Rússlandi til Shetlandseyja þegar það hafi fengið fyrirmæli frá útgerðarfélagi sínu um að bíða austur af Stokksnesi eftir hagstæðari veðurskilyrðum. 

Segir að varðstjórar Landhelgisgæslunnar hafi komið auga á skipið í ferilvöktunarkerfum og óskað eftir nánari upplýsingum um siglingu þess, en þar sem skipið hafi verið á alþjóðlegu hafsvæði hafi því ekki verið skylt að senda gögn varðandi siglinguna. Var beiðninni vel tekið og fengu varðstjórar upplýsingar sem óskað var eftir. Fékk skipið svo heimild útgerðar til að halda áfram siglingunni og er nú komið út úr íslensku efnahagslögsögunni.

Tekið er fram að skipið hafi allan tímann verið statt á alþjóðlegu hafsvæði þar sem siglingar séu frjálsar, en þó innan íslensku efnahagslögsögunnar.

„Full ástæða var því fyrir varðstjóra Landhelgisgæslunnar að fylgjast grannt með skipinu, enda viðkvæmur farmur um borð sem myndi valda miklum skaða ef eitthvað færi úrskeiðis. Bárust reglulegar skeytasendingar sl. daga frá skipinu þar sem það upplýsti um aðstæður,“ segir á vef Landhelgisgæslunnar.