Launin lækkuðu eftir hrun en hækkuðu á ný
Það hefur verið nóg að gera hjá stjórn Fjármálaeftirlitsins síðustu árin. Laun stjórnarmanna hækkuðu árið 2009. mbl.is/Sigurgeir
Launakostnaður vegna stjórnarmanna í Fjármálaeftirlitinu hefur hækkað úr 12,7 milljónum árið 2007 í 24 milljónir á næsta ári. Stjórnarmenn fá í dag 200 þúsund krónur á mánuði í laun, en stjórnarformaðurinn fær 600 þúsund krónur í laun. Laun hans voru hækkuð á árinu 2009 úr 220 þúsund krónum í 600 þúsund krónur.
Umræða um launakjör þeirra sem sitja í stjórn Fjármálaeftirlitsins hófust eftir að efnahags- og viðskiptaráðherra lagði fram frumvarp um breytingu á lögum um greiðslu kostnaðar við opinbert eftirlit með fjármálastarfsemi. Í greinargerð með frumvarpinu sagði: „Efnahags- og viðskiptaráðherra ákvarðar þóknun stjórnarmanna og að óbreyttu verður hún 24 millj. kr. á árinu 2012, samanborið við 13,5 millj. kr. í upphaflegri áætlun ársins 2011. Ákvörðun ráðherra grundvallast á mati á tíðni og tímalengd funda, samanburði við þóknun stjórna eftirlitsskyldra aðila, þeim viðamiklu takmörkunum sem stjórnarmenn sæta til öflunar annarra tekna og hæfniskröfum sem þeir þurfa að uppfylla.“
Síðar hefur komið fram að ákvörðun um breytingu á launum stjórnarmanna var síðast tekin haustið 2010, degi áður en nýr ráðherra settist í efnahags- og viðskiptaráðuneytið. Samt rata þessar upplýsingar fyrst fyrir sjónir almennings vegna fjárveitinga til FME árið 2012.
Launin hækkuðu úr 220 þúsund í 600 þúsund
En hver eru laun þeirra sem sitja í stjórn FME? Stjórnarformaðurinn er með 600 þúsund krónur á mánuði, en aðrir eru með 200 þúsund krónur. Launin voru í ársbyrjun 2007 120 þúsund krónur á mánuði og stjórnarformaður var með 240 þúsund krónur. Launin voru hækkuð myndarlega 1. október 2008, um svipað leyti og bankarnir voru að falla. Þá voru laun stjórnarmanna 260 þúsund og laun stjórnarformanns 520 þúsund krónur á mánuði. Launin voru þrívegis lækkuð á árinu 2009 og voru haustið 2009 komin niður í 110 þúsund krónur (stjórnarformaður með 220 þúsund).
Hinn 1. september 2010 voru laun stjórnarformanns hækkuð úr 220 þúsund í 600 þúsund á mánuði og gilti hækkunin afturvirkt til 1. mars. Þetta er 172% hækkun. Þau hafa verið óbreytt síðan. Laun almennra stjórnarmanna voru hækkuð 1. aprílúr 110 þúsund í 140 þúsund og 1. september í 200 þúsund. Síðan hefur einvörðungu verið gerð sú breyting að laun varamanna í stjórn eru nú þau sömu og laun aðalmanna.
Samkvæmt upplýsingum frá Fjármálaeftirlitinu hefur engin breyting verið gerð á launum stjórnarmanna í FME frá ársbyrjun 2011 og ekki er fyrirhugað að gera neina breytingu á laununum á næsta ári.
Heildarlaunakostnaður vegna stjórnarmanna í FME var 12,7 milljónir árið 2008, 12 milljónir vegna 2009, 14,5 milljónir vegna 2010, 22,6 milljónir vegna 2011 og áætlaður kostnaður vegna ársins 2012 er 24 milljónir. Samkvæmt þessu hækkar launakostnaðurinn frá 2010 til 2012 um 65%.
Samkvæmt ársskýrslu Landsbanka fyrir árið 2010 fékk stjórnarformaður bankans um 440 þúsund krónur í laun á mánuði. Almennir stjórnarmenn í Landsbanka eru með 250 þúsund krónur í laun á mánuði.
Stjórnarmenn í Íslandsbanka eru með 350 þúsund krónur í laun á mánuði, en stjórnarformaðurinn er með 525 þúsund á mánuði.
Hafa unnið fyrir kaupinu
„Við þetta er því að bæta að stjórn FME hefur undanfarin ár haft mikla sérstöðu í samanburði við aðrar stjórnir stofnana hjá hinu opinbera. Álag á stjórnarmenn, eins og raunar starfsmenn stofnunarinnar, hefur verið gríðarlegt. Þann tíma sem ég var ráðherra fundaði stjórnin þannig vel á annað hundrað sinnum, sem gerði um 6,5 fundi að meðaltali á mánuði. Fundir eru oft langir og fyrir liggur mikið magn gagna sem stjórnarmenn þurfa að kynna sér fyrir fundi. Það er því í mínum huga enginn vafi á því að þeir sem hafa tekið að sér þetta starf hafa þurft að vinna fyrir kaupinu sínu.“
Þetta segir Gylfi Magnússon, fyrrverandi efnahags- og viðskiptaráðherra, í yfirlýsingu þar sem hann útskýrir þær breytingar sem gerðar hafa verið á launum stjórnarmanna í Fjármálaeftirlitinu.
