Hafnarfjörður. mbl.is

Bæjarstjórn Hafnarfjarðar samþykkti á fundi sínum í dag lánasamning við skilanefnd Depfa-banka. Sjálfstæðismenn í bæjarstjórn voru afar óánægðir með niðurstöðuna, sem þeir segja óásættanlega fyrir Hafnfirðinga, og ekki síður að afgreiðslan hafi farið fram fyrir luktum dyrum.

Sjálfstæðismenn bókuðu við afgreiðsluna, að óviðunandi sé og ólýðræðislegt að svo mikill trúnaður ríki um kjör og önnur ákvæði samningsins að bæjarbúar verði ekki upplýstir um innihald hans og að afgreiðsla samningsins hafi farið fram fyrir luktum dyrum. „Augljóst er að meirihluti Samfylkingar og Vinstri grænna er að fresta því að taka á fjárhagsvandanum fram yfir næstu kosningar og reyna þannig að bjarga pólitísku lífi sínu. [...] Samningurinn sem nú liggur fyrir er óásættanleg niðurstaða fyrir Hafnfirðinga.“

Þá segir að með fyrirhuguðum samningi verði greiðslubyrði sveitarfélagsins gríðarleg á næstu árum og skilmálar í samningnum bindi hendur bæjarins til vaxtar og þróunar á komandi árum.

Ófrávíkjanleg krafa viðsemjenda

Í bókun meirihlutans segir að um mikilvægan áfanga sé að ræða til að styrkja stöðu og rekstur Hafnarfjarðar. Samkomulagið sé hagsætt bæjarfélaginu í alla staði og um leið traustsyfirlýsing frá lánadrottnum um stjórnun og rekstur bæjarfélagsins. „Samkomulagið er ekki síst ótvíræður vitnisburður um þann árangur sem náðst hefur í fjárhagslegri stjórnun bæjarfélagsins eftir þau áföll sem dundu yfir við efnahagshrunið fyrir liðlega 3 árum. Með góðri samvinnu og samstarfi bæjaryfirvalda, bæjarstarfsmanna og bæjarbúa hefur tekist, þrátt fyrir þröngar aðstæður, að treysta innviði og afkomu bæjarfélagsins sem m.a. sýnir sig í góðri afkomu bæjarsjóðs á því ári sem nú er að líða og enn styrkari stöðu á komandi árum.“

Þá segir að óábyrgur málflutningur einstakra bæjarfulltrúa Sjálfstæðisflokksins á umliðinum mánuðum og misserum, um fjárhagsleg mál bæjafélagsins, hafi síst af öllu verið til að auðvelda þá vinnu sem stjórnendur bæjarsins hafa staðið í við gerð þessa samkomulags. „Staðreyndir skipta meiru en staðleysur og upphrópanir og í þeim efnum talar samkomulagið sínu máli. Ljóst er af umræðu og bókunum bæjarfulltrúa Sjálfstæðisflokksins að samkomulagið veldur þeim sárum vonbrigðum, en það er greinilega af öðrum ástæðum en þeim kjörum sem bæjarfélaginu stendur til boða.“

Þá sé það þannig, að viðsemjendur bæjarins hafi sett fram ófrávíkjanlega kröfu um trúnað um ákvæði samkomulagsins. „Hins vegar hefði núverandi meirihluti gjarnan viljað upplýsa um öll ákvæði þess. Leyndarhyggja núverandi meirihluta er ekki meiri en svo að rætt hefur verið um endurfjármögnun á a.m.k. tuttugu fundum í bæjarráði og bæjarstjórn. Fullyrðingar bæjarfulltrúa Sjálfstæðisflokksins um ólýðræðisleg vinnubrögð standast því enga skoðun.“

Greiða niður lán að fjárhæð 1,4 milljarðar króna.

Í fjárhagsáætlun Hafnarfjarðar fyrir árið 2012 sem var lögð fram á fundi bæjarstjórnar segir að rekstrarniðurstaða A og B hluta sé  jákvæð um 156,7 millj.kr. og rekstrarniðurstaða A hlutans 41,9 millj.kr. „Heildareignir samstæðunnar eru áætlaðar um 44,8 milljarðar kr. í árslok 2012 og skuldir og skuldbindingar eru áætlaðar um 37 milljarðar kr. og eigið fé er 7,5 milljarðar kr.  Verðmæti lóða að fjárhæð 11 milljarða kr. er ekki í bókum bæjarins en verðmæti þeirra vega á móti langtímalánum bæjarins og lækka þar með áhættuna sem felst í skuldsetningunni.“ Á næsta ári er ráðgert að greiða niður lán að fjárhæð 1,4 millj.kr.

Þá er á það bent að á undanförnum árum hafi verið dregið úr framkvæmdum og fjárfestingum en í áætlun ársins 2012 sé gert ráð fyrir 190 millj.kr., þó er ekki er gert ráð fyrir neinni lóðarsölu í áætlun fyrir árið 2012.

Gert er ráð fyrir hóflegum hækkunum og breytingum á gjaldskrá sveitarfélagsins. Í flestum tilfellum mun hækkunin aðeins fylgja verðlagsbreytingum og hækkun aðfanga og launa.

Seinni umræða um fjárhagsáætlunina fer fram 19. desember nk.