Steingrímur Sævarr Ólafsson, ritstjóri Pressunnar.

Steingrímur Sævarr Ólafsson, ritstjóri Pressunnar, hefur sent afsökunarbeiðni á fjölmiðla vegna fréttar og ljósmyndar sem vefmiðillinn birti í gær af stúlku sem hefur lagt fram kæru um nauðgun.

Steingrímur segir að Pressunni hafi orðið á stór mistök í gær. Fréttin hafi verið óvönduð og tillitslaus.

Afsökunarbeiðnin er svohljóðandi:

„Pressunni urðu á stór mistök í gær. Um það er ekki deilt.

Frétt með mynd um unga stúlku sem lagt hefur fram kæru um nauðgun var óvönduð og tillitslaus.

Í afsökunarbeiðni minni fyrir hönd Pressunnar, þegar fréttin var fjarlægð af vefnum, fólst einlæg afsökunarbeiðni og er hún ítrekuð nú. Í henni var hins vegar leitast við að útskýra en alls ekki afsaka hvers vegna fór sem fór. Ásetningurinn var ekki að verja kynferðisofbeldi heldur að upplýsa um málsatvik í aðdraganda brots sem fengið hefur mikla umfjöllun.

Ásetningurinn skilaði sér ekki. Pressan gekk allt of langt og tók ekki tillit til málsaðila.

Afsökunarbeiðnin skilaði sér heldur ekki. Því er hún endurtekin svo að enginn velkist í vafa um að hún er sett fram í fyllstu einlægni.

Sem ritstjóri Pressunnar ber ég ábyrgð á öllum skrifum á miðlinum og þar af leiðandi á þessum stóru mistökum. Pressan tekur þau mjög alvarlega. Það vita lesendur að hún hefur gagnrýnt harðlega kynferðisbrotamenn og stutt einarðlega við bakið á fórnarlömbum kynferðisofbeldis með margvíslegum hætti og fjölmörgum fréttum.

Mistökin, sem ég, bæði sem ritstjóri og faðir, harma af öllu hjarta eru því ekki vottur um ritstjórnarstefnu Pressunnar. Þvert á móti. Þetta er alls ekki líkt okkur.

Ef ég gæti tekið þennan atburð til baka, þá myndi ég svo sannarlega gera það. Ég get hins vegar fullvissað lesendur Pressunnar um það að hún hefur dregið lærdóm af þessu máli.

Öllum þeim, sem Pressan brást, einkum hlutaðeigendur, bið ég forláts á birtingu þessarar fréttar.

Ég biðst afsökunar.“