Frá þingfestingu málsins yfir Viggó Þórissyni. mbl.is

Viggó Þórisson, fyrrverandi framkvæmdastjóri Verðbréfaþjónustu Sparisjóðanna, sem ákærður er fyrir stófelld umboðssvik, er sagður hafa falsað skjöl til að ábyrgjast skuldabréfaútboð fyrir David Spargo sem eftirlýstur er í Bandaríkjunum fyrir fjársvik. Þetta kemur fram í frétt bandaríska dagblaðsins Chicago Tribune.

Spargo er eftirlýstur í Bandaríkjunum þar sem hann hefur ekki endurgreitt fjárfestum jafnvirði tæpra 660 milljóna króna í Texas og Virginíu sem höfðu keypt skuldabréf af fyrirtæki hans. Þá er mál hans til rannsóknar á Ítalíu en talið er að skuldabréfasvik Spargos nemi alls jafnvirði tæpra 60 milljarða króna.

Segir bandaríska blaðið frá því að nú sé nýtt mál komið upp sem varði tæplega 84 milljarða króna skuldabréfaútboð fyrirtækisins Napis árið 2006 en það er í eigu Spargos. Segir í fréttinni að ríkislögreglustjóri á Íslandi hafi ákært Viggó, sem stundaði nám í ríkisháskólanum í Arizona í Phoenix á sama tíma og Spargo bjó í borginni, fyrir að hafa falsað skjöl til að gefa út ábyrgðaryfirlýsingar fyrir útboðið.

Spargo er nú búsettur á Mallorca á Spáni en bandarísk stjórnvöld geta ekki farið fram á að hann verði framseldur þar sem málin sem voru höfðuð gegn honum í Arizona eru einkamál.

Mál Viggós var tekið fyrir í Héraðsdómi Reykjaness í dag. Sætti hann farbanni í 23 mánuði á meðan rannsókn málsins var í gangi og hefur enginn sætt farbanni jafnlengi og hann á Íslandi.

Frétt Chicago Tribune af máli Viggós Þórissonar og David Spargo.

Ákærður fyrir stórfelld umboðssvik.