Veðrið getur sett mark sitt á póstferðir í dreifðari byggðum. Ljósmynd/Jón G. Guðjónsson

„Ég hef aldrei lent í öðrum eins éljum og aldrei séð svona stór högl áður. Maður gleymir bara öllu undir svona aðstæðum nema að hugsa um sjálfan sig og farkostinn," segir Jón Guðbjörn Guðjónsson póstur sem lenti í gríðarlegu hagléli í Trékyllisvík í gær.

Jón hafði sótt póst að sunnan sem kom með áætlunarvélinni á flugvöllinn í Gjögri um miðjan dag í gær og var að dreifa honum á bæina við Norðurfjörð í talsverðu éljaveðri. Þegar komið var í Trékyllisvík dundu hinsvegar skyndilega gríðarstór högl yfir bílinn og stóð á með ógurlegum hryðjum út Hraun og alla leið til Gjögurhálsa. Að sögn Jóns var haglélið svo mikið og dimmt í verstu hryðjunum að það var eins og skotárás hefði verið gerð á bílinn.

Hryðjurnar stóðu yfir í um hálftíma að sögn Jóns og voru höglin allt frá 6 mm og upp í 1 cm í þvermál. „Einu sinni sneri ég bílnum undan, því ég átti allt eins von á því að hliðarrúðurnar brotnuðu undan og ég vildi frekar að afturrúðan færi ef til þess kæmi. Þetta voru svo svakalegar hryðjur," segir Jón sem hefur lent í margvíslegu veðri á póstferðum sínum en segist aldrei hafa séð annað eins.

Sjálfur er Jón veðurathugunarmaður á Litlu-Ávík og tilkynnti um haglélin til Veðurstofunnar um leið og heim var komið. Skýringin á þessu óvenjulega hagléli mun vera hitabreytingar í lofti í gær, en þá dró skyndilega mikið úr frosti. Að sögn Jóns hefur kólnað aftur og er frost nú um 7 stig.