Erfið færð hefur verið á Suðurlandi og Suðurnesjum í dag. Myndin er úr myndasafni. mbl.is/RAX

Óveðrið sem geisað hefur í dag á að ganga niður niður sunnan- og suðvestanlands með kvöldinu. Hitinn kemst þá rétt yfir frostmark og um leið eykst hálkan, að sögn veðurfræðings Vegagerðarinnar.

Á Austfjörðum er spáð stórhríð með hvassviðri og talsvert mikilli ofankomu í kvöld, nótt og fram á morgundaginn. Einkum á það við um fjallvegina. Einnig ofanhríð suðaustanlands í kvöld, en þar ætti að hlána með krapasnjó í nótt.

Að sögn Þorsteins Jónssonar, veðurfræðings hjá Veðurstofu Íslands, er lægð að ganga norður yfir landið en hann gerir ráð fyrir heldur muni lægja þegar líður á kvöldið vestanlands, á morgun gæti víða orðið hríð öðru hverju. Hins vegar gæti snjóað mikið í nótt á Austfjörðum. Kuldinn þokar um stund en á þriðjudag má búast við öðru kasti sem staðið gæti út vikuna.

Hálkublettir eru á Sandskeiði, Hellisheiði og í Þrengslum en á Suðurlandi er víða nokkur hálka eða jafnvel snjóþekja. Hálka og skafrenningur er á Reykjanesbraut og ýmist snjóþekja, hálkublettir eða skafrenningur á Suðurnesjum. Suðurstrandarvegur er ófær sem og Krýsuvíkurleið. 

Á Vesturlandi eru hálkublettir eða hálka en þæfingsfærð er á Fróðárheiði. Hálka og snjóþekja er á flestum vegum á Vestfjörðum. Á Norðurlandi er víðast hvar snjóþekja, hálka og éljagangur. Skafrenningur er sumstaðar í Húnavatnssýslu.

Norðaustanlands er hálka, snjóþekja og skafrenningur. Þungfært og skafrenningur er á Hólasandi og flughálka í Þistilfirði.

Hálka eða hálkublettir eru um allt austanvert landið. Þungfært er á Breiðdalsheiði og ófært á Öxi.

Hálkublettir eru á köflum á Suðausturlandi en snjóþekja vestast.