Dagur rauða nefsins var fyrst haldinn hátíðlegur árið 2006. Golli / Kjartan Þorbjörnsson

Landsmenn tóku afar vel í söfnunarátakið Dag rauða nefsins sem Barnahjálp Sameinuðu þjóðanna, UNICEF, stóð fyrir í gær, segir í fréttatilkynningu frá landsdeild UNICEF á Íslandi. Um 1.650 manns hringdu meðan á söfnunar- og skemmtiþætti UNICEF stóð og vildu ýmist gerast heimsforeldrar eða hækka framlag sitt. Margir hafa auk þess skráð sig á heimasíðu UNICEF í dag, www.unicef.is. Einnig lögðu ótal einstaklingar og fyrirtæki söfnuninni lið með stökum framlögum.  

Heimsforeldrar gegna lykilhlutverki í starfi UNICEF og óhætt er að fullyrða að í gegnum tíðina hafi heimsforeldrar á Íslandi bjargað lífi ótal barna um heim allan með stuðningi sínum. Heimsforeldrar gera UNICEF kleift að veita bágstöddum börnum heilsugæslu, menntun, vernd, hreint vatn og vannærðum börnum næringu og lífsbjörg. UNICEF á Íslandi býður alla nýju heimsforeldrana hjartanlega velkomna í hópinn.

Miðað við reynsluna úr fyrri söfnunum á degi rauða nefsins má ætla að heildarvirði stakra framlaga og mánaðarlegs stuðnings heimsforeldra á degi rauða nefsins í gær sé 170 milljónir. „Við erum ákaflega þakklát fyrir þennan mikla stuðning. Það er greinilegt að fólki á Íslandi er umhugað um börn og þeirra velferð, hvar svo sem þau í heimi búa,“ segir Stefán Ingi Stefánsson, framkvæmdastjóri UNICEF á Íslandi.

„Því miður er það þannig að alltof mörg börn búa við óviðunandi skilyrði og látast af orsökum sem auðvelt og ódýrt er að koma í veg fyrir. Þessu vill UNICEF breyta. Hinn mikli stuðningur í gærkvöldi er staðfesting á því að Íslendingar vilja taka þátt í því verkefni.“