Frá húsnæði Tryggingastofnunar. mbl.is/Árni Torfason

Ekki eru vísbendingar um hagkvæmni þess að sameina Tryggingastofnun ríkisins og Sjúkratryggingar Íslands á ný, samkvæmt mati sem velferðarráðuneytið hefur látið vinna. Þetta kemur fram í skriflegu svari velferðarráðherra, Guðbjarts Hannessonar, við spurningu Guðmundar Steingrímssonar varðandi skoðun á starfsemi stofnananna frá því þeim var skipt upp í tvær stofnanir.

Fram kemur í svari ráðherra að þróun stofnananna frá uppskiptingu hefur verið jákvæð. Verkefnum þeirra er nú betur sinnt en fyrir uppskiptingu. Tækifæri til að þróa ný vinnubrögð og aðferðir hafa þó ekki verið nýtt sem skyldi. Samstarf stofnananna hefur ekki gengið eins og lagt var upp með og mörg álitaefni enn óleyst. Stefna og ákvarðanir stofnananna hafa dregið úr samþættingu og mögulegum kostnaði fulls aðskilnaðar. Þörf fyrir samstarf stofnananna virðist minnka. Ekki eru vísbendingar um hagkvæmni þess að sameina stofnanirnar að nýju.   

Guðmundur spurði jafnframt hvort kæmi til greina að sameina aftur TR og SÍ í ljósi stefnu ríkisstjórnarinnar um sameiningu stofnana. Hefur hagræðing slíkrar sameiningar verið metin?

„Á vegum ráðuneytisins er nú unnið að endurskoðun fjölmargra þátta velferðarþjónustunnar, þ.m.t. starfsemi stofnana og mögulegum breytingum sem gætu í senn stuðlað að aukinni hagræðingu og betri þjónustu við einstaklinga. Starfsemi Tryggingastofnunar og Sjúkratrygginga er hér ekki undanskilin. Þessi endurskoðun takmarkast hins vegar ekki við hugsanlega sameiningu einstakra stofnana heldur nær hún einnig til aukins samstarfs einstakra stofnana og frekari samhæfingar ýmissa þjónustuþátta. Þannig er nú unnið að heildarendurskoðun á lögum um almannatryggingar, undirbúningi að auknu og víðtæku velferðareftirliti, samræmingu bótagreiðslna o.fl. Stefnt er því að ljúka þessari vinnu á næsta ári," segir meðal annars í svari velferðarráðherra.