Tugir milljarða í húfi
Sérstakur saksóknari. mbl.is/Ómar
Alls eru 182 mál í rannsókn embættis sérstaks saksóknara. Um 100 mál tengjast hruninu beint, að sögn Ólafs Þórs Haukssonar, sérstaks saksóknara.
Hrunmálin eru öll frekar stór og eru peningaþvættismálin meðal þeirra stór og mynda regnhlíf yfir önnur mál. Brotin eru mjög umfangsmikil og þeir fjármunir sem þeim tengjast hlaupa á tugum milljarða. Meðal annars hafa peningar verið kyrrsettir í Lúxemborg en Ólafur Þór vildi ekki fara nánar í það í Kastljósi í kvöld vegna rannsóknarhagsmuna.
Ólafur Þór sagði í Kastljósi Sjónvarpsins í kvöld að hann væri mjög sáttur við framkvæmdina við rannsókn embættisins en nokkur vandi væri að forma rannsóknina í einhverjum tilvikum þar sem rannsóknir af þessu tagi hafa ekki komið til kasta hins opinbera áður. Búast mætti við því að línur skýrðust á næsta ári í þeim málum sem er verið að rannsaka í tengslum við viðskiptabankana þrjá, Glitni, Landsbankann og Kaupþing. Rannsókn á Kaupþingi er komin lengst en ekki er víst að því máli ljúki fyrst.
Sérstakur saksóknari á von á því að næsta ár verði stórt hvað varðar lok mála en árið 2014 verði embættið komið fyrir vind í að ljúka rannsókn mála og ákvarða hvort ákært verði eða mál felld niður.
Í Glitnisrannsókninni voru á annað hundrað yfirheyrslur á nokkrum dögum auk þess sem farið er yfir símaupptökur og fleira.
Í einu málinu sem til rannsóknar er hjá embættinu eru um fimm milljónir gagna tengdar rannsókninni en meðal annars hafa símar verið hleraðir og farið yfir gríðarlegt magn tölvupóstsamskipta.
Ólafur Þór segir að ekki séu miklar gloppur í þeim gögnum sem eru til staðar en slíkt hefur að vísu gerst í einstaka málum. Hins vegar virðist sem gögn hafi verið sett inn eftir á. Embættið hefur grun um að menn hafi verið að bera sig saman áður en þeir eru yfirheyrðir og það sýni símahleranir fram á.
Símahleranir embættisins voru ræddar á Alþingi á sínum tíma og segir Ólafur Þór að slíkar hleranir byggist á að viðkomandi viti ekki af því. Þeir sem hlut áttu að máli voru að hans mati grandalausir fyrir því að embættið beitti slíkum aðferðum en eftir að upplýst var um það opinberlega hafa símhleranir ekki nýst sem skyldi.
