Drög að tillögu að matsáætlun vegna kísilmámverksmiðju á Bakka eru í kynningu. mbl.is/GSH

Tveir verkefnisstjórar frá fjölþjóðlega fyrirtækinu PCC SE ætla að kynna fyrirtækið og fyrirhugaða byggingu kísilmálmverksmiðju á Bakka á Húsavík fyrir íbúum á svæðinu á kynningarfundi sem hefst kl. 17:30 í dag.

Bergur Elías Ágústsson sveitarstjóri Norðurþings, segir að Ólafur Árnason frá verkfræðifyrirtækinu Eflu muni einnig kynna matsáætlun sem fyrir liggur  á fundinum.

Vinna er hafin við mat á umhverfisáhrifum vegna fyrirhugaðrar byggingar á kísilmálmverksmiðjunni. Samstarfssamningur hefur verið gerður milli Norðurþings og PCC SE um verkefnið en gert er ráð fyrir að reist verði verksmiðja með framleiðslugetu allt að 66.000 tonn á ári af kísilmálmi.

Viðræðum á milli fyrirtækisins og Landsvirkjunar um raforkukaup er ekki lokið en heildarorkuþörf hennar verður um 52MW í upphafi og 104 MW þegar stækkuninni er lokið.

Verði verksmiðjan að veruleika verður hún reist í tveimur áföngum, sá fyrri verður 33.000 tonn á ári.  Gert er ráð fyrir að verksmiðjan rísi á um 20 hekturum af iðnaðarsvæðinu á Bakka. 

Bergur Elías segir heimamenn ánægða með gang þessa verkefnis. „Þetta virðist vera traust og gott fyrirtæki en í ljósi reynslunnar gæta menn þess alltaf að byggja ekki upp of miklar væntingar.“

Áætlað er að 150 framtíðarstörf skapist við rekstur kísilmálmverksmiðjunnar að ótöldum þeim störfum sem að skapast á svæðinu vegna kaupa verksmiðjunnar á orku og þjónustu.