Mikilvægur áfangi fyrir Palestínu
Hallur Már - hallurmar@mbl.isÖssur Skarphéðinsson, utanríkisráðherra, afhenti Riad Malki utanríkisráðherra Palestínu formlega viðurkenningu Íslands á sjálfstæði og fullveldi Palestínu við athöfn í Þjóðmenningarhúsinu í morgun.
Össur sagði við þetta tækifæri, að einkar ánægjulegt væri að enginn hafi greitt atkvæði gegn ályktuninni á Alþingi um að íslenska ríkisstjórnin viðurkenndi fullveldi Palestínu.
Malki segir að viðurkenning Íslands hafi mikla þýðingu fyrir baráttu Palestínumanna, sérstaklega í ljósi þess að Ísland sé hluti af Evrópu og með þessu sýni Íslendingar samstöðu með palestínsku þjóðinni. Eftir þessu væri tekið, ekki síst þar sem umræða um málefni Palestínumanna hefði að nokkru leyti dottið niður. Þetta væri vottur um einlægan stuðning sem gangi þvert á pólitískar skoðanir sem palestínsku þjóðinni þykir vænt um og viðurkenningin sé í því ljósi ólík öðrum stuðningsyfirlýsingum sem Palestína hefur fengið í gegn um tíðina.
Malki segir það jafnframt merkilegt að Amal Tamimi fyrsta konan af erlendum uppruna til að taka sæti á Alþingi skuli koma frá Palestínu og hann vonast til að vera hennar á þingi geti orðið til að styrkja samband ríkjanna.
Í orðsendingu sem utanríkisráðherra Íslands afhenti Dr. Malki kemur fram að samkvæmt ályktun Alþingis frá 29. nóvember 2011 hafi íslensk stjórnvöld frá og með 15. desember 2011 viðurkennt Palestínu sem sjálfstætt og fullvalda ríki innan landamæranna frá því fyrir sex daga stríðið árið 1967.
Dr. Malki sagði samband Íslands og Palestínu einstakt og bar íslenskum stjórnvöldum, Alþingi og íslensku þjóðinni þakkir forseta síns og palestínsku þjóðarinnar. Hann sagði ákvörðun Íslands miklu skipta þar sem nú væri Palestína viðurkennd í fyrsta sinn af ríki í vestur- og norðurhluta Evrópu. Hann vænti þess að þetta hefði áhrif á aðrar þjóðir sem vonandi feti í fótspor Íslands sem myndi hafa jákvæð áhrif á friðarumleitanir og öryggi í Mið-Austurlöndum. Þá sagði hann 130 ríki nú viðurkenna Palestínuríki sem sé mikil hvatning fyrir Palestínumenn að halda áfram uppbyggingu sjálfstæðs lýðræðisríkis. Dr. Malki sagði að Palestínumönnum muni ávallt verða minnisstætt að samþykkt Alþingis átti sér stað hinn 29. nóvember sem er alþjóðlegur samstöðudagur með palestínsku þjóðinni.
