112 meintir barnaníðingar handteknir
112 hafa verið handteknir grunaðir um barnaníð í Evrópu Reuters
Alls hafa 112 einstaklingar sem eru grunaðir eru um barnaníð verið handteknir í 22 Evrópulöndum í sameiginlegri aðgerð Europol og lögreglu í ríkjunum 22. Að sögn Björgvins Björgvinssonar, yfirmaður kynferðisbrotadeildar lögreglunnar á höfuðborgarsvæðinu, var enginn handtekinn á Íslandi en Ísland var ekki aðili rannsókninni en öll hin Norðurlöndin tóku þátt í aðgerðinni.
Á vef Berlingske Tidende eru 19 Danir meðal hinna handteknu, karlmenn á aldrinum 24-55 ára.
Á blaðamannafundi Europol í Haag í dag kom fram að mennirnir sem voru handteknir eru grunaðir um að hafa dreift á netinu myndböndum þar sem börn eru beitt kynferðislegu ofbeldi og nauðgað.
Framkvæmdastjóri Europol, Rob Wainwright, segir að nú þegar hafi lögregla í ríkjunum 22 borið kennsl á 269 einstaklinga sem eru grunaðir um barnaníð. Af þeim hafa 112 verið handteknir.
Ríkislögreglustjóri Danmerkur segir í samtali við Berlingske að aðgerðin sem nefnist Íkarus hafi verið unnin í samstarfi við Europol.
Alls tók lögregla í 26 löndum þátt í aðgerðunum en þær miðuðu að því að hafa uppi á þeim sem deildu óhugnanlegasta efninu. Meðal annars eru myndbönd af smábörnum beitt ofbeldi af barnaníðingum. Mikið af efninu fannst við húsleitir á heimilum þeirra sem hafa verið handteknir.
Rannsóknin stendur enn yfir og á Europol að enn fleiri verði handteknir í tengslum við rannsóknina. Sérstök áhersla er lögð á að finna framleiðendur myndefnisins sem og börnin sem urðu fyrir ofbeldinu. Meðal þeirra sem voru handteknir er karlmaður sem hafði hlaðið niður barnaníði en hann er grunaður um að hafa ætlað sér að beita barn sjálfur ofbeldi. Var hann handtekinn áður en hann hitti barnið augliti til auglitis.
Löndin sem tóku þátt eru: Austurríki, Belgía, Búlgaría, Kýpur, Tékkland, Danmörk, Eistland, Finnland, Frakkland, Þýskaland, Írland, Ítalía, Lúxemborg, Malta, Holland, Pólland, Slóvakía, Spánn, Svíþjóð, Króatía, Noregur og Sviss.
Jens Henrik Højbjerg, ríkislögreglustjóri Danmerkur segist vera ótrúlega stoltur yfir framgangi og kunnáttu danskra lögreglumanna í stórum rannsóknum sem þessum.
Í mars sl. handtók lögregla í nokkrum Evrópuríkjum á annað hundrað einstaklinga, þar á meðal íslenskur karlmaður um þrítugt, í tengslum við umfangsmikla rannsókn lögreglu í nokkrum löndum á barnaklámshring á Netinu.
Alls eru um 70 þúsund manns taldir tengjast barnaklámshringnum en 184 voru handteknir í umfangsmiklum aðgerðum lögreglu í mars, meðal annars á Bretlandi, Bandaríkjunum, Ástralíu og Brasilíu. Teygði málið einnig anga sína hingað til lands.
Kynferðisbrotadeild lögreglunnar á höfuðborgarsvæðinu bárust gögn um málið á síðasta ári en í þeim var íslensk IP-tala (einkennistala tölvu) rakin til manns á höfuðborgarsvæðinu.
Í framhaldinu var Íslendingurinn handtekinn og yfirheyrður og hjá honum gerð húsleit. Hald var lagt á tölvubúnað en í honum fundust gögn um þátttöku mannsins í spjalli á Netinu þar sem umræðuefnið var barnaníð.
Íslendingurinn, sem notaðist ávallt við sama gælunafn þegar hann tók þátt í spjalli af þessu tagi, viðurkenndi aðild sína að málinu. Maðurinn, sem hefur áður komið við sögu hjá lögreglu hérlendis og fékk átta mánaða fangelsisdóm árið 2006 fyrir vörslu á myndefni sem sýndi börn misnotuð kynferðislega, neitaði því hinsvegar að hafa undir höndum efni sem sýndi kynferðislegt ofbeldi gagnvart börnum.
Engu að síður fundust í tölvugögnum hans fimm hreyfiskeið sem öll sýndu kynferðislegt ofbeldi gagnvart börnum.
