Aðsetur sérstaks saksóknara. mbl.is

„Hvað varðar tímasetninguna þá tel ég hana ekki óeðlilega, skjalið var gefið út í síðustu viku og síðan ræðst það af því hvenær birting tekst hver tímasetningin er á því að útgáfa ákærunnar spyrst út.“

Þetta segir Ólafur Þór Hauksson, sérstakur saksóknari, spurður út í hvort óeðlilegt teljist að gefa út ákærur svo stuttu fyrir jólahátíðina. Ákæran var birt þeim Lárusi Welding og Guðmundi Hjaltasyni á föstudaginn síðastliðinn. Ólafur Þór bendir auk þess á að ekki sé að finna neinar takmarkanir að þessu leytinu til í lögum.

Hvað varðar rannsókn annarra mála og útgáfu fleiri ákæra ítrekaði Ólafur Þór í samtali við fréttavef Morgunblaðsins, mbl.is, á sunnudagskvöld, að rannsókn á tíu málum sem tengjast bankahruninu væri að ljúka. Hann gat ekki fullyrt að ákært yrði í fleiri slíkum málum fyrir áramót, en á von á því fljótlega í byrjun nýs árs.

Í fréttaskýringu um þetta mál í Morgunblaðinu í dag segir, að ákæran í umræddu máli sé  þriðja ákæran sem embætti sérstaks saksóknara gefur út. Í lok júní voru þrír menn ákærðir í svokölluðu Exeter-máli. Annað málið var ákæra á Baldur Guðlaugsson, fyrrverandi ráðuneytisstjóra í fjármálaráðuneytinu.