Katla Rax / Ragnar Axelsson

Afar litlar líkur eru á að Kötlugos yrði nokkuð í líkingu við Skaftárelda, eitt mesta eldgos á jörðinni á sögulegum tímum. Þetta er mat Páls Einarssonar, jarðvísindamanns við Háskóla Íslands, sem bregst þannig við hamfaraspám í ýmsum fjölmiðlum að undanförnu.

Páll hvetur almenning til að halda ró sinni þrátt fyrir svartar spár ýmissa álitsgjafa um Kötlugos. Fjölmiðlar hafa sýnt slíkum röddum áhuga, nú síðast þeirri spá bandarísks veðurfræðings að veðurfar á jörðinni geti kólnað vegna stórgoss í Kötlu. Þá má rifja upp þann fréttaflutning breska útvarpsins, BBC, að Kötlugoss geti leitt til hungursneyða og hamfaraflóða, greining sem bresk umhverfissamtök hafa gagnrýnt.

Tugir virkra eldfjalla

Páll bendir á mikla eldvirkni á Íslandi. „Við ættum að halda okkur frá sýn hrakspámanna á eldfjöll. Á Íslandi eru um 30 virk eldfjöll og við upplifum gos á tveggja til þriggja ára fresti. Svo þegar við segjum að gjósa muni í eldfjalli þýðir það ekki að því muni fylgja hörmungar,“ sagði Páll í samtali við Xinhua, eina helstu fréttaveitu Kína, fjölmennasta ríkis heims, í einkaviðtali í gær.

„Líklegt er að eldgos verði í nokkrum eldfjöllum á næstu árum en það þýðir ekki að það sé stórfrétt. Það er fremur eins og að segja að það verði bílslys á morgun,“ sagði Páll í lauslegri þýðingu.

Viðtal Xinhua við Pál má nálgast hér.