Púðar frá Poly Implant Prothese. Reuters

Lyfjastofnun vinnur að því að afla upplýsinga um gallaða brjóstapúða sem franska fyrirtækið Poly Implant Prothese framleiddi. Unnið er að því að fá það staðfest hvort púðarnir hafi verið notaðir hér á landi og hvort nauðsynlegt sé að bregðast við þeim tíðindum sem hafa borist frá Evrópu.

Í gær var greint frá því að frönsk yfirvöld muni biðja um 30.000 konur í Frakklandi um að láta fjarlægja sílikonbrjóstapúða sem þær hafa fengið grædda í sig. En þær hafa mögulega fengið gallaða púða sem geta verið skaðlegir heilsu þeirra. Málið teygir anga sína víðar.

Samkvæmt upplýsingum frá Lyfjastofnun hefur ekki verið sérstök skráning á notkun púðanna hér á landi, sem flokkast sem lækningatæki (e. medical device). Stofnunin, sem tók við verkefninu frá Landlæknisembættinu fyrr á þessu ári, hefur því fremur takmarkaðar upplýsingar sem stendur.

Fylgst með viðbrögðum nágrannaþjóða

„Við fylgjumst mjög vel með því sem er að gerast hjá öðrum lyfjastofnunum, sem hafa með lækningatæki að gera,“ segir Mímir Arnórsson, deildarstjóri upplýsingadeildar Lyfjastofnunar, í samtali við mbl.is.

Stofnunin sé þegar búin að afla sér upplýsinga frá Frakklandi, Bretlandi og Danmörku. „Við gerum það sem við getum til þess að afla okkur allra upplýsinga, og bregðumst við á þann hátt sem nágrannaþjóðir okkar bregðast við,“ segir Mímir og bætir við að málið nái mjög víða, m.a. til Bandaríkjanna.

Nú sé unnið að því að fá það staðfest hvort sílikonpúðar frá Poly Implant Prothese, sem er nú hætt störfum, hafi verið notaðir hér á landi. Framleiðslu á þeim var hætt fyrir rúmu ári.