Ómar Óskarsson

Samkvæmt nýju yfirliti Vegagerðarinnar má reikna með hríðarveðri og takmörkuðu skyggni á Vesturlandi, Norðurlandi og Austfjörðum fram á kvöld, en síðan mun hlána annars staðar á landinu en á Vestfjörðum og hætt er við flughálku.

Bendir Vegagerðin á að við þessar aðstæður, þegar fer að rigna ofan í snjó og samanþjappaðan ís á vegum, verði flughált og ekki bæti úr skák að spáð er hvassviðri eða stormi í kvöld og nótt áður en það frystir á ný.

Hálka og skafrenningur er á Sandskeiði og Hellisheiði en hálka í Þrengslum. Á Suðurlandi er annars hálka eða hálkublettir en sumstaðar snjóþekja í uppsveitum. Þungfært er á Suðurstrandarvegi.

Á Vesturlandi er þæfingsfærð á Holtavörðuheiði og verið að hreinsa. Hálka er á flestum leiðum. Flughált er á nokkrum leiðum í uppsveitum Borgarfjarðar. Hálka og skafrenningur er á Mýrunum og hálka og snjókoma á norðanverðu Snæfellsnesi. Þæfingsfærð er á mill Stykkishólms og Grundarfjarðar og verið að hreinsa. Snjóþekja og éljagagnur er á Bröttubrekku. Hálka og skafrenningur er í Svínadal.

Á Vestfjörðum er ófært og stórhríð á Klettshálsi. Þæfingsfærð og skafrenningur á Hálfdáni, Mikladal og Kleifaheiði. Snjóþekja og skafrenningur er á Gemlufallsheiði, Steingrímsfjarðarheiði og Þröskuldum. Hálka er á flestum öðrum leiðum.

Á Norðurlandi er snjóþekja og skafrenningur í Húnavatnssýslum. Hálka er á flestum öðrum leiðum en snjóþekja á útvegum. Hálka og éljagangur er á Öxnadalsheiði og flestum leiðum í kringum Akureyri.

Á Austurlandi er hálka og sumstaðar flughált á fáfarnari leiðum. Frá Egilsstöðum og suður fyrir Breiðdalsvík er snjóþekja eða krapasnjór og éljagangur.

Með Suðausturströndinni er hálka og éljagangur, flughált er vestan við Vík en snjóþekja fyrir austan.