Einar Olgeirsson mbl.is

Einar Olgeirsson, fyrrverandi hótelstjóri, andaðist á sjúkrahúsinu í Volda í Noregi 21. desember sl., 77 ára að aldri.

Einar fæddist í Reykjavík 2. desember 1934 og var sonur hjónanna Hólmfríðar Sigurðardóttur húsmóður og Olgeirs Sigurðssonar húsasmíðameistara.

Hann útskrifaðist sem framreiðslumaður árið 1953 frá Iðnskólanum í Reykjavík og sótti ótal námskeið og starfsþjálfun hérlendis og erlendis.

Einar starfaði sem framreiðslumaður í ráðherrabústaðnum, Sjálfstæðishúsinu, Þórscafé, Breiðfirðingabúð, Hótel Borg og ms. Gullfossi á árunum 1953-1960. Hann var yfirframreiðslumaður á ms. Gullfossi 1960-1962 og yfirframreiðslumaður í Veitingahúsinu Klúbbnum 1962-1965. Hann starfaði sem aðstoðarhótelstjóri á Hótel Sögu í 10 ár eða til 1975 þegar hann fluttist til Húsavíkur og starfaði sem hótelstjóri á Hótel Húsavík frá 1975-1980. Hann starfaði sem starfsmannastjóri á Hótel Sögu 1980-1981.

Á árunum 1981-1987 starfaði Einar sem hótelstjóri á Flugleiðahótelunum, fyrst á Hótel Esju og seinna á Hótel Loftleiðum. Frá árinu 1987 starfaði hann sem hótelstjóri á Hótel Esju og Hótel Loftleiðum eða þangað til hann settist í helgan stein árið 1999.

Einar gegndi fjölmörgum trúnaðarstörfum um ævina fyrir sín fagfélög og var bæði í stjórn og formaður Sambands hótela og veitingahúsa. Hann var forseti Hótel- og veitingasambands Norðurlanda, formaður skólanefndar Hótel- og veitingaskóla Íslands og í nefnd veitingahúsa frá árinu 1989.

Einar hlaut fjölda viðurkenninga á sínum starfsferli, þar má nefna heiðursmerki Margrétar Danadrottningar árið 1973, gullmerki Ólafs V. Noregskonungs 1974, silfurorðu Karls Gústafs Svíakonungs 1987 og Lúxemborgarorðuna Chevalier de l'ordre de Mérite 1986. Hann fékk einnig viðurkenningarskjöl frá Ronald Reagan Bandaríkjaforseta, 1986, og George P. Shultz, utanríkisráðherra Bandaríkjanna, 1987.

Eftirlifandi eiginkona Einars er Emilía Sigurjónsdóttir. Börn þeirra eru Septína Selma, Rannveig Eir, Óskar og Sveinn Geir. Börn Einars frá fyrra hjónabandi eru Kristinn Maríus, Hólmfríður og Olgeir.