Færð og veður verða með versta móti á morgun. Rax / Ragnar Axelsson

Eftir Önund Pál Ragnarsson

Einar Sveinbjörnsson veðurfræðingur, sem vinnur spár fyrir Vegagerðina þessa dagana, segir að hætta sé á því að svikalogn verði suðvestanlands snemma á morgun í tvo til þrjá klukkutíma. Fólk sem hyggur á ferðalög þurfi því að hafa varann á sér þótt ef til vill líti út fyrir hið ágætasta ferðaveður framan af morgninum.

„Við fáum yfir nánast allt landið nokkuð djúpa lægð, sem gerist nú ekki svo oft. Hún verður orðin talsvert djúp við suðvesturströndina í fyrramálið og fer bara þvert yfir landið frá suðvestri til norðausturs. Með henni fáum við alls kyns veður sem er meira og minna af vondri tegund," segir Einar.

Fólk hafi varann á sér

„En af því að lægðarmiðjan fer nánast yfir Faxaflóann þá gerist það að það verður hálfgert svikalogn í fyrramálið, það styttir upp að mestu um miðjan morgun og verður hið ágætasta veður í fyrramálið en svo eins og hendi sé veifað brestur hann á með hvassviðri og mjög dimmri hríð á leiðinni austur fyrir fjall," varar hann við.

Veður verði svo vont fram eftir degi en verði orðið ágætt um það leyti sem jólin verða hringd inn. Hvort þetta rætist veltur þó allt á því, að sögn Einars, hvort lægðin fer þá leið sem nú lítur út fyrir. Það mun skýrast í kvöld og í nótt.

Veðrið sem fylgir lægðinni verður ef til vill óvenjulegt að öðru leyti líka. Ekki eru líkur á, eins og svo oft áður, að versta veðrið komi á undan skilum lægðarinnar, heldur  hláni með þessum skilum sunnan og austan til í nótt og í fyrramálið. Þó verður hríðarveður á fjallvegum eins og Hellisheiðinni í nótt og í Oddsskarði í fyrramálið.

Í fyrramálið versnar veðrið um allt norðvestanvert landið og spáir Einar ofanhríð í Bröttubrekku, á Holtavörðuheiði og Vatnaleið, frá því í fyrramálið og fram á daginn. Því sama spáir hann vestur á fjörðum, kannski örlítið skaplegra veðri við norðanvert Ísafjarðardjúp.

Ofsaveður fyrir norðan og austan annað kvöld

„En seinni partinn á morgun fer veður víðast annars staðar versnandi með hríðarveðri fyrir norðan og fyrir austan brestur hann á svona um það leyti sem fólk er að taka steikina úr ofninum eða halda til messu. Þá skellur hann á með norðan- og norðvestanátt, eiginlega bara ofsaveðri í kjölsogi lægðarinnar," segir Einar.

Það er því hætta á að sums staðar á landinu komist fólk jafnvel ekki í kirkjugarða eins og hefð er fyrir á aðfangadag.

Veðurstofan spáir um og yfir 40 m/s í hviðum

Veðurstofan fylgist einnig með veðrinu og sendi frá sér viðvörun nú um hádegisbilið. Lægð berst upp að landinu í nótt, dýpkar hratt og veldur sunnan hvassviðri og rigningu sunnantil snemma í fyrramálið en slyddu eða snjókomu til fjalla. Á Vestfjörðum er spáð norðan hvassviðri og snjókomu fram yfir hádegi.

Lægðin gengur norðaustur yfir land og síðdegis er spáð norðvestan stormi með snjókomu á austurhluta landsins. Vindhraði gæti þar farið upp í 23-28 metra á sekúndu og hviður yfir 40 m/s um og eftir kl. 18.

Landsmönnum er bent á að athuga vel bæði færð, veður og veðurspá áður en þeir leggja í ferðalög á milli landshluta því færð spillist mjög fljótt í veðri sem þessu.  Ljóst er að veður verður slæmt í öllum landshlutum á mismunandi tíma á morgun, og nauðsynlegt að gæta varúðar.

Nýjustu upplýsingar um veður og færð er að finna á heimasíðum Veðurstofunnar og Vegagerðarinnar.

Vegfarendur eru einnig beðnir að hafa í huga að víða er ekki mokstur, eða önnur þjónusta á vegum, á kvöldin og nóttunni. Raunar eru sumir vegir ekki í þjónustu nema fáa daga í viku. Upplýsingar um þjónustutíma eru á vef Vegagerðarinnar og í síma 1777.