„Yndislegt og draumi líkast“
Mugison á einum af boðstónleikunum í gær. mbl.is/Einar Falur
„Þetta hljómar eins og klisja, en þetta var bara yndislegt og draumi líkast,“ segir Örn Elías Guðmundsson, betur þekktur sem Mugison, um þrjá boðstónleika sem hann hélt í Hörpunni í gærkvöldi.
Mugison er að eigin sögn mjög sáttur með tónleikana. „Þetta var næstum því of gott til þess að vera satt, það liggur við að maður sé með samviskubit, þetta var of gaman.“ Að sögn Mugisons var góð stemning á tónleikunum og bæði áhorfendur sem og strákarnir í hljómsveitinni „í geðveikum fíling“ ekki bara einu sinni heldur þrisvar í gærkvöldi. „Þetta var alveg fáránlegur dagur í gær,“ segir Mugison.
„Það gekk alveg rosavel, það var greinilega alveg fullt af fólki sem fékk sér súpu,“ segir Mugison aðspurður hvernig súpuveisla sem faðir hans, Guðmundur M. Kristjánsson, einnig þekktur sem Mugipapa, hélt fyrir tónleikana til styrktar Mæðrastyrksnefnd.
Að sögn Mugisons hefur hann fengið þær upplýsingar frá forsvarsmönnum Hörpu að um 1600-1700 manns hafi verið á hverju „giggi“. „Já, þetta var eiginlega bara auðveldara en mig þorði að gruna svona líkamlega, það eru náttúrlega helvítis átök að öskra eins og svín í einn og hálfan tíma, þrisvar sinnum,“ segir Mugison og bætir við „en samt einhvern veginn eftir síðasta giggið, þarna rétt fyrir tvö í nótt, þá var samt eitthvað svona í manni „djöfullinn, maður hefði átt að taka fjögur“, að því okkur fannst við allir eiga inni einhverja orku.“
Mugison segist hafa fengið sér viskídreitil til þess að ná sér niður eftir tónleikatörnina enda hafi blóðið verið fullt af adrenalíni. „Svo sofnaði ég ekki fyrr en klukkan sex í morgun,“ segir Mugison og bætir við: „Þetta er svo mikið adrenalín, ég hugsa að allir íþrótta- og tónlistarmenn þekki þetta, þegar svona rosalegt stuð er í gangi fer eitthvað út í blóðið, það er endalaus orka í gangi og svo krassar maður bara.“
Að sögn Mugisons er kaffidrykkja besta leiðin til þess að ná sér á strik á ný. „Ég held að ég sé búinn með tvo tvöfalda expressó síðan ég vaknaði og þriðji hlýtur að detta inn bráðum,“ segir Mugison.
„Ég vil skila kærri kveðju til allra sem komu og voru með okkur, þetta var stórkostleg stund,“ segir Mugison að lokum.
Einar Falur Ingólfsson fylgdi Mugison eftir á tónleikadeginum og hermir af viðburðinum í máli og myndum í Sunnudagsmogganum um helgina.
