Margir lögðu leið sína í Kringluna í morgun, en verslunum þar verður lokað klukkan eitt. Mbl.is/Golli

„Í fyrra var alveg klikkað að gera á jóladag,“ segir Baldvin Agnarsson, verslunarmaður í Pétursbúð á Ránargötu, í vesturbæ Reykjavíkur.

Þeir sem uppgötva á síðustu stundu í dag og á morgun, jóladag, að þeir hafa gleymt einhverju í matinn, þurfa ekki að örvænta. Opið er í Pétursbúð til klukkan 17:00 í dag og frá 12:00 til 17:00 á jóladag.

Baldvin segir að framan af degi í dag hafi verið rólegt í búðinni og þannig hafi það líka verið á jóladag í fyrra. Hins vegar hafi búðin svo til fyllst af fólki eftir að sagt var frá því í útvarpinu að hún væri opin. Full þörf var því greinilega á því að redda jólahaldi margra, sem höfðu jafnvel gleymt að kaupa sjálft hangiketið eða hamborgarhrygginn og allt mögulegt þar á milli.

Minnist Baldvin sérstaklega ungrar konu sem hafði fengið það hlutverk að koma með tartalettur í jólaboðið, en gleymdi að kaupa þær og þóttist hafa himin höndum tekið að komast í búð. Baldvin segir fáa gera ráð fyrir því að komast í búð á jóladag, en æði marga gleyma hinu og þessu sem nauðsynlegt þykir í jólamáltíðina.

Þó nokkuð var að gera í verslunum í Kringlunni í morgun þegar ljósmyndari mbl.is var þar á ferð. Kringlan lokar kl. 13 og lokað verður á jóladag og annan í jólum.