Biskup Íslands, Karl Sigurbjörnsson. mbl.is/Ómar

„Iðkun trúarinnar tengir kynslóðir þessa lands í þúsund ár, kynslóð etir kynslóð,“ sagði biskup Íslands, Karl Sigurbjörnsson, við aftansöng jóla í sjónvarpinu á aðfangadagskvöld. Biskup söng sína síðustu jólamessu á miðnætti í Dómkirkjunni í gær.

„Ef það er eitthvað sem tengir saman kynslóðirnar í þessu landi – annað en landið okkar, stórbrotin náttúra, mild og hörð í senn, og tungan, íslensk tunga, þá er það trúin!“ sagði biskup. „Iðkun trúarinnar tengir kynslóðir þessa lands í þúsund ár, kynslóð eftir kynslóð: skírnin, signingin, Faðir vor. Allt hefur breyst, meir og minna allt, en ekki þetta. Hugleiddu það, íslenska þjóð, í umbrotum og uppgjöri sem ekki sér fyrir endann á.

Þarna er traustur, sterkur þráður sem tengir okkur við fyrri tíðar kynslóðir, sem glímdu við þetta land og öguðu hugsun sína við íslenska tungu, sögur og ljóð, og signdu börnin, báru þau til skírnar og lögðu þeim Faðir vor á varir. Gætum þess að sá trausti, helgi þráður slitni ekki!“