Bílaröð teygir sig nú út í Kollafjörð, en verið er að opna fyrir umferð á nýjan leik. Ljósmynd/Ölvir S. Sveinsson

Samkvæmt tilkynningu frá lögreglunni á höfuðborgarsvæðinu er umferð óðum að komast aftur á hreyfingu á Vesturlandsvegi við Álfsnes, eftir sex bíla árekstur þar í kvöld.

Sex bílar lentu alls í slysinu að einhverju leyti. Aðvífandi bílar ýmist lentu á tveimur sem fyrst höfðu skollið saman, eða sveigðu frá og höfnuðu utan vegar. Þrír slösuðust samkvæmt heimildum mbl.is og tveir voru fluttir með sjúkrabílum á slysadeild.

Varðstjóri lögreglunnar, sem var á vettvangi, sagði að skemmdir á bílunum væru miklar, sérstaklega á þeim sem lentu hvor framan á öðrum. Þeir gætu jafnvel verið ónýtir. Fjórir sjúkrabílar og einn dælubíll frá slökkviliði, útbúinn klippum, voru sendir á staðinn auk lögreglu sem fór þangað.

Varðstjóri segist vonast til þess að hægt verði að opna fyrir umferð í báðar áttir innan næsta hálftíma, en nú er beðið eftir kranabíl til að fjarlægja bílana af veginum. Enn er því einhver bið eftir að opnað verði.