Persónuvernd hefur hafnað beiðni Styrktarfélags lamaðra og fatlaðra um undanþágu frá því að virða bannmerkingar í Þjóðskrá við áritun og útsendingu happdrættismiða félagsins.

Félagið rökstuddi umsókn sína með því að ef ekki væri heimilt að senda miða til þeirra sem væru bannmerktir fengi fjöldi velunnara félagsins ekki sendan miða og um umtalsverðan tekjusamdrátt yrði að ræða hjá félaginu.

Viðurkennt var í umsókninni að með því að bæta við þeim bannmerktu í fjáröflun sína væri gengið lengra í tilfelli félagsins en annarra aðila með sambærilegar fjáraflanir, en "í ljósi mikilvægis þessarar tekjuöflunar fyrir félagið og að okkar mati óverulegs áreitis fyrir friðhelgi einkalífs einstaklings..." fór félagið þess á leit að heimilt yrði að nota skrá yfir þá sem eru bannmerktir.

Persónuvernd vísar til 28. greinar persónuverndarlaga, en í henni er stofnuninni veitt heimild til að veita undanþágur frá banninu. Segir í úrskurðinum að gögnum frá Alþingi sjáist að vilji löggjafans við setningu reglunnar hafi verið sá að undantekningum frá skyldunni til að virða bannmerkingar yrði stillt í hóf, svo að óskir einstaklinga um að verða teknir af skrá fyrir markpóst og símtöl yrðu virtar.

Persónuvernd taldi enn fremur að ekki væri um sérstakt tilvik að ræða og hafnaði því beiðninni.

Úrskurðinn í heild má lesa hér.