Mörður Árnason. mbl.is

Mörður Árnason, þingmaður Samfylkingarinnar, gagnrýnir Kristrúnu Heimisdóttur, fyrrverandi aðstoðarmann Ingibjargar Sólrúnar Gísladóttur sem utanríkisráðherra, fyrir opinber skrif hennar um flokksstjórnarfund samfylkingarmanna á föstudag. Mörður setur skrifin í samhengi við hrunið.

Sem kunnugt er stendur mikil umræða fyrir dyrum innan Samfylkingarinnar vegna starfs umbótanefndar um þátt flokksins í hruninu. Mörður segir nefndarstarfið valda titringi.

„Það er líka augljóst að við tölum ekki nógu mikið saman í Samfylkingunni. Við höfum til dæmis ekki gert almennilega upp við þátttökuna í hrunstjórninni þrátt fyrir umbótanefndina. Í gær voru einmitt áberandi í liði óánægðra ýmsir hugmyndafræðingar og burðarmenn þess stjórnarsamstarfs – þar á meðal Kristrún Heimisdóttir aðstoðarmaður sem í dag skrifar sérkennilegan pistil út frá nýjasta átrúnaðargoði sínu, aumingja Árna Páli Árnasyni.“

Samræðustjórnmálin sýndarmennska

Á sama tíma og Mörður leggur áherslu á samræður gerir hann lítið úr áherslu Ingibjargar Sólrúnar á samræðustjórnmál og segir þau ekki hafa verið iðkuð í Samfylkingunni á tímum hennar sem formanns.

„Svo komu tímar Ingibjargar Sólrúnar – og þá hélt sýningarhaldið áfram á þessum fundum, nema nú voru höfð viðamikil pallborð og sérdagskrár þar sem gáfumenn úr akademíunni töluðu yfir höfuðið á venjulegu flokksfólki. Samræðustjórnmálin sem Solla kenndi sig við, þau voru einhvernveginn stunduð alstaðar annars staðar en í flokknum.“

Óánægja með Steingrím

Mörður segir marga samfylkingarmenn hafa viljað losna við Steingrím J. Sigfússon úr embætti fjármálaráðherra.

„Að ætla – einsog heyrðist á sumum í gærkvöldi – að stefna stjórnarsamstarfinu í voða af því að Steingrímur væri sestur þangað, það er undarleg ævintýramennska. Nú má vel vera að Steingrímur sé hinn versti maður, en þeir hinir sömu sem í gær voru reiðastir Jóhönnu vegna þessa glapræðis, þeir sögðu ekki múkk þegar illmenninu mikla var afhentur sjálfur ríkiskassinn á silfurfati vorið 2009.

Og þeir sögðu reyndar heldur ekki neitt þegar Árni Mathiesen varð fjármálaráðherra með stuðningi Samfylkingarinnar. Einar K. Guðfinnsson varð kvótakerfislénsherra í umboði flokksins. Þegar Samfylkingin setti yfir heilbrigðisþjónustuna sjálfan Guðlaug Þór Þórðarson.“

„Bólgnar hugmyndir Árna Páls um eigið mikilvægi“

Mörður víkur einnig að þeim metnaði Árna Páls að leiða Samfylkinguna.

„Hann hefur gert margt gott sem ráðherra félagsmála og svo efnahags- og viðskiptamála, snarpur í málafylgju, duglegur, kann að laða menn til samstarfs. Hann hefur líka haft svolítið of bólgnar hugmyndir um eigið mikilvægi og forustuhlutverk sem leiðtoga einhvers arms „krata“ og Ingibjargar-Sólrúnar-sinna, sem ég hef aldrei skilið hvað gengur út á ef hann er til yfirhöfuð. Kannski þess vegna hafa íhald og Framsókn reynt að gera hann að „sínum manni“ í ríkisstjórninni og borið á hann klígjukennt oflof.“

Pistil Marðar má lesa hér.