Jón Ólafsson við vatnsverksmiðjuna í Ölfusi.

Jón Ólafsson athafnamaður segist ekki á leið í forsetaframboð en fram hefur komið í fréttum í dag að hann hafi á nýársfagnaði á Hótel Borg í gærkvöldi lýst yfir framboði sínu til embættis forseta Íslands.

Jón kannaðist við að hafa séð fréttir þessa efnis og sagðist í samtali við mbl.is hafa verið fenginn til að taka þátt í smá skemmtiatriði í gærkvöldi. „Sem ég og gerði og það virðist hafa tekist vel því þetta er núna orðin einhver fiskisaga,“ segir Jón og tekur fram að hann sé ekki kjörgengur á Íslandi.

„Það getur hver sem er orðið forseti á Íslandi. Þjóðin þarf að finna hæfa manneskju, konu eða mann, sem er vel menntuð og vel gerð og er til fyrirmyndar og ég er ekki þessi manneskja sem verið er að leita að,“ segir Jón og segist aðspurður ánægður með að grínið hafi fallið í góðan jarðveg.