mbl.is

Skeljungur segist hafa gert kröfu um, að hér eftir skili framleiðandi áburðar, sem fyrirtækið hefur flutt inn, upplýsingum um að magn kadmíums sé í samræmi við íslensk viðmiðunarmörk, áður en varan er flutt til landsins.

Skeljungur segir, að magn kadmíums í áburðinum, sem fluttur var inni í fyrra, hafi komið fyrirtækinu í opna skjöldu. Hafi Skeljungur treyst því, að um væri að ræða sama áburð og keyptur hafi verið undanfarin ár þar sem kadmíuminnihald hafi verið mjög lágt eða vart greinanlegt. 

Hafi Skeljungur og Carrs, sem er breskur framleiðandi áburðarins, strax leitað skýringa á þessu hjá birgjum Carrs. Í ljós hafi komið, að vegna fosfórskorts í Rússlandi hefði fosfórbirgir Carrs aflað hans frá nýju svæði og hafi sá fosfór reynst vera kadmíumríkari en sá rússneski.

Matvælastofnun hafi í kjölfarið verið upplýst nákvæmlega um hvernig þetta kom til og stofnunin hafi ekki séð ástæðu til þess að stöðva dreifingu áburðarins.

Í tilkynningu frá Skeljungi kemur fram að engar takmarkanir í gildi í Evrópusambandinu um kadmíum-magn í áburði, en þrjú lönd auk Íslands hafa sett sérstök viðmiðunarmörk. „Þetta eru Austurríki, Finnland og Svíþjóð. Í Finnlandi eru mörkin hin sömu og á Íslandi eða 50 mg Cd/ kg P. Í Austurríki eru mörkin 75 mg Cd/ kg P og í Svíþjóð er miðað við 100 mg Cd/ kg P sem er tvöfalt meira magn en hér á landi. Í flestum landbúnaðarríkjum  Evrópu eru hins vegar, eins og áður sagði, ekki um neinar takmarkanir að ræða,“ segir í tilkynningunni.