Fanney Þorbjörg segir jákvæðni, bjartsýni og mikinn stuðning fjölskyldu og vina hafa skipt miklu máli undanfarna daga.

„Ég veit að ég verð ennþá sterkari eftir þetta en ég var áður,“ segir Fanney Þorbjörg Guðmundsdóttir, nítján ára landsliðskona í skíðaíþróttum, sem slasaðist alvarlega á skíðum á aðfangadag og brotnaði meðal annars á hrygg og hálsi.

Slysið átti sér stað í bænum Geilo í Noregi. Bati Fanneyjar þykir með ólíkindum, en læknar telja hana geta staðið upp í næstu viku. Fyrir fimm árum lenti Arna Sigríður Albertsdóttir í áþekku slysi í sama bæ. Arna Sigríður hlaut mænuskaða og hefur verið í hjólastól eftir slysið.

Viku eftir slysið var Fanney farin að hreyfa útlimi. Hún mun fljótlega útskrifast af sjúkrahúsinu og leggjast inn á endurhæfingarsjúkrahús þar sem tveggja til þriggja mánaða endurhæfing og þjálfun tekur við. Bati hennar þykir með ólíkindum, en hún þakkar hann ekki síst einstökum stuðningi vina og fjölskyldu.

Ljóst þykir að skíðaferill Fanneyjar er á enda. Í samtali í Morgunblaðinu í dag segir hún það vissulega vera sárt, en hún hefur lagt mikið á sig til að stunda íþróttina. „Skíðin hafa skipt mig öllu máli,“ segir Fanney. „Ég flutti 17 ára gömul að heiman frá Íslandi til að stunda skíði. Ferillinn var á uppleið og mér hefur gengið glimrandi vel undanfarið,“ segir Fanney.

„Ég var alveg miður mín, sérstaklega því að fréttirnar voru svo slæmar fyrst,“ segir Arna Sigríður um slys Fanneyjar í samtali í blaðinu.