Morgunblaðið/Hjálmar S. Brynjólfsson

Matvælastofnun segir að við næsta innflutning á áburði, sem Skeljungur hefur flutt inn, verði dreifing áburðarins ekki heimiluð fyrr en efnagreining sýnir fram á að hann standist kröfur.

Fram kemur á heimasíðu stofnunarinnar, að Skeljungur hafi í fyrra flutt inn rúmlega 11 þúsund tonn af áburðartegundum undir heitinu Sprettur, sem breska fyrirtækið Carrs framleiðir. Í þessum áburði hafi verið um 440 tonn af fosfór.

Við  efnagreiningar á þessum áburði hafi kadmíum-innihald reynst vera ríflega tvöfalt það sem leyfilegt sé samkvæmt íslenskum reglum. Fyrstu niðurstöður, sem gáfu til kynna að kadmíum væri yfir mörkum, komu 20. maí og endanleg niðurstaða 9. júní. Heildarmagn kadmíums í þessum áburði var um 50 kíló. Segir Matvælastofnun að þessi áburður sé fullgild vara í flestum Evrópulöndum en þau hafa hærri eða engin mörk hvað innihald kadmíums varðar.

„Á undanförnum árum hefur kadmíum í  áburði þessa fyrirtækis verið langt undir mörkum og oftast ekki í mælanlegu magni. Því var afhending og sala á áburðinum heimiluð á meðan á sýnatöku og efnagreiningu stóð.  Við næsta innflutning verður dreifing þessa áburðar ekki heimiluð fyrr en efnagreining sýnir fram á að hann standist kröfur, eins og fram kemur í lýsingu á verklagi eftirlits að ofan. Í ljósi þess að þarna var um einstakt tilvik að ræða, ekki bráða hættu og að áburðurinn var að verulegu leyti farinn í dreifingu til kaupenda, var tekin sú ákvörðun að krefjast ekki innköllunar á áburðinum," segir á vef Matvælastofnunar.