Einn þeirra fugla sem Björn Gísli hefur skráð og myndað er fuglinn sorarella sem finnst í Ameríku. mbl.is/Björn Gísli

„Þetta er talsverður slatti af fuglum,“ segir Björn Gísli Arnarson fuglaáhugamaður en hann hefur frá upphafi mælinga sinna, sem rekja má aftur til ársins 1977, séð alls 307 fuglategundir hér á landi.

Einna helst segir hann fuglana vera að finna á Suðvestur- og Suðausturlandi. Segir Björn Gísli ýmsar ástæður vera fyrir því að fuglarnir komi til Íslands en algengast virðist vera að þeir villist af leið sinni. Til marks um það nefnir hann t.a.m. að oft og tíðum er um að ræða stakan fugl í stað hópa.

„Það voru miklar suðaustanáttir á tímabili í haust og af og til allt árið, en vor og haust eru aðalfartími fuglanna, þá hrekjast þessi grey af leið.“ Í Morgunblaðinu í dag segir, að af  þessum 307 fuglategundum sem Björn Gísli hefur skráð og myndað undanfarna áratugi má telja um 70 tegundir til íslenskra varpfugla sem finnast hér að staðaldri.