mbl.is/Golli

Alls eru 77 starfsmenn Reykjavíkurborgar og verktakar á hennar vegum við snjóhreinsun og hálkuvarnir á 48 ökutækjum í borginni. Hefur verið unnið frá klukkan fjögur í nótt. Þetta kemur fram í tilkynningu frá framkvæmdasviði Reykjavíkurborgar.

Eins og undanfarnar vikur hefur verið unnið frá því klukkan fjögur í nótt um alla borg við snjóhreinsun og hálkuvarnir gatna- og gönguleiða í samræmi við forgangsröðun í snjóhreinsun. Reglubundinn akstur hefur verið í allan dag á stofnbrautum og á helstu umferðargötum. Illfært var í efri byggðum borgarinnar í morgun og því settur aukinn tækjakostur þangað, stórvirkar vinnuvélar, við snjóruðning.    

Sjö vegheflar að störfum í húsagötum

Áfram hefur verið unnið í húsagötum með sjö vegheflum til að ná niður hryggjum en þau tæki eru það eina sem vinnur á hörðum klakanum. Unnið er í Smáíbúðahverfi, Vogum, Sundum, Kleppsholti, Laugarnesi, Norðurmýri, Háaleitishverfi, Vesturbæ norðan Hringbrautar, Seláshverfi og Seljahverfi. Einnig er unnið við snjóruðning í efri byggðum með stórvirkum vinnutækjum.

Hafist var handa í nótt við að flytja á brott stærstu snjóhaugana sem myndast hafa við snjóhreinsun liðinna vikna. Byrjað var við Egilsgötu og haldið verður áfram við þessa vinnu við Barónsstíg, Langholtsveg og Leifsgötu. Ráðist er á haugana þar sem þeir eru hæstir og mest til trafala og er ráðgert að halda þessari vinnu áfram næstu daga.  

Eins og undanfarna daga er unnið við snjóhreinsun og söndun á göngustígum sem og aðkomuleiðum að biðstöðvum strætó.

Margir íbúar hafa leitað til hverfastöðva Reykjavíkurborgar og náð sér í salt og sand til að bera á einkalóðir og innkeyrslur, samkvæmt upplýsingum frá framkvæmdasviði.