Erfðabreytt bygg á tilraunasvæði Orfs.

Kynningarátak um erfðabreyttar lífverur hefur farið fram á það við Umhverfisstofnun að hún afturkalli umsvifalaust leyfi Orfs Líftækni til ræktunar erfðabreyttra plantna í gróðrarstöðinni Barra á Egilsstöðum en hún skemmdist mikið í veðurofsanum aðfaranótt þriðjudags.

Í gróðrarstöðinni er stunduð tilraunaræktun á erfðabreyttu byggi og fuku um fimmtán plötur af tveimur gróðurhúsum, en aðeins náðist að loka húsunum að hluta. „Þessir atburðir staðfesta að áhyggjur, sem margir hafa haft og tjáð opinberlega af ræktun
erfðabreyttra plantna í gróðurhúsum, eiga við rök að styðjast og að leyfisveitingar Umhverfisstofnunar til svokallaðrar afmarkaðrar notkunar erfðabreyttra lífvera byggjast á ófullnægjandi öryggis- og áhættumati,“ segir í tilkynningu frá Kynningarátaki um erfðabreyttar lífverur.

Kynningarátakið sem Landvernd, Matvæla- og veitingafélag Íslands, Náttúrulækningafélag Íslands, Neytendasamtökin, Slow Food Reykjavík og Vottunarstofan Tún standa að krefjast þess því að leyfi Orfs Líftækni hf. til ræktunar erfðabreyttra plantna í gróðrarstöðinni Barra hf. verði umsvifalaust afturkallað.