Það er eins gott að fara varlega í umferðinni í dag, bæði ökumenn og gangandi vegfarendur þar sem mjög hált er víða. mbl.is/Golli

Umferðin hefur gengið bærilega á höfuðborgarsvæðinu í morgun og ekki tilkynnt um neina árekstra það sem af er morgni til lögreglu. Mikill vatnselgur er á götum á höfuðborgarsvæðinu og biður lögregla ökumenn að fara varlega í umferðinni.

Samkvæmt upplýsingum frá Vegagerðinni er einnig vatnselgur á Sandskeiði og eru vegfarendur beðnir að sýna aðgát.

Starfsmenn Reykjavíkurborgar eru byrjaðir að bera sand á götur og göngustíga í borginni en í gær var byrjað að hreinsa frá niðurföllum gatna.

Að sögn lögreglu munar miklu um að ekki snjóaði í nótt líkt og spáð hafði verið. Spáð er hlýju veðri og rigningu um helgina.

Slökkvilið höfuðborgarsvæðisins hvetur íbúa til að huga að niðurföllum til að forða vatnstjóni vegna hlákunnar. Sérstaklega þurfi að passa að niðurföll í kjöllurum og svölum  séu opin.

Slökkviliðið hvetur líka forsvarsmenn fyrirtækja til að fullvissa sig um að ekki sé hætta á vatnstjóni um helgina. Mörg dæmi eru um að vatn leki inn í fyrirtæki meðan engin starfsemi er í þeim yfir helgi.

Reykjavíkurborg hefur hvatt íbúa til að sækja sand og salt á hverfisstöðvar borgarinnar en í einhverjum tilvikum er sandur uppurinn, samkvæmt upplýsingum mbl.is

Hálkublettir eru á Hellisheiði, í Þrengslum og á Sandskeiði. Flughált á flestum útvegum á Suðurlandi. Þæfingur er á Lyngdalsheiði og hálka á Mosfellsheiði.

Á Vesturlandi er snjóþekja og hálkublettir norðan megin á Snæfellsnesi. Hálka er á flestum öðrum leiðum á Vesturlandi þá eru hálkublettir í uppsveitum Borgarfjarðar en flughált í Lundarreykjadal og á Hvítárvallavegi.

Á Vestfjörðum er flughált mjög víða. Á Norðurlandi vestra er hálka á flestum leiðum. Flughált á útvegum í Húnavatnssýslum, á Innstrandarvegi og frá Hofsósi í Ketilás.
Á Norðausturlandi er flughált á Öxnadalsheiði. Hálka á flestum öðrum leiðum, þó er snjóþekja í Kelduhverfi til Raufarhafnar um Hófaskarðsleið. Austan- og suðaustanlands er hálka. Flughált er milli Víkur og  Kirkjubæjarklausturs.