Þór Saari, þingmaður Hreyfingarinnar. mbl/Ómar Óskarsson

„Mér finnst þetta vera mjög alvarlegt því það var verið að ræða þetta mál í sambandi við fjárlögin í fyrra og þar kom aldrei nokkurs staðar fram að samgönguráðuneytið hefði látið gera þessa skýrslu,“ sagði Þór Saari, þingmaður Hreyfingarinnar, á fundi umhverfis- og samgöngunefndar Alþingis í morgun þar sem rætt var um Vaðlaheiðargöng og skýrslur sem unnar hafa verið um þau.

Þór vísaði þarna til skýrslu sem Hagfræðistofnun Háskóla Íslands vann sumarið 2010 fyrir samgönguráðuneytið (í dag hluti innanríkisráðuneytisins) þar sem meðal annars var fjallað um Vaðlaheiðargöng og hvað veggjald um þau þyrfti að vera hátt til þess að framkvæmdin stæði undir sér í ljósi mögulegra lánveitinga til þeirra.

Sú skýrsla var hins vegar aldrei gerð opinber, hvorki af Hagfræðistofnun né samgönguráðuneytinu. Sveinn Agnarsson, forstöðumaður Hagfræðistofnunar, sagði í samtali við mbl.is fyrir helgi að það væri ekki hlutverk stofnunarinnar að gera skýrslur opinberar sem hún ynni fyrir einstaka verkkaupa. Í þessu tilfelli samgönguráðuneytið.

Eins og greint var frá í Morgunblaðinu á laugardaginn virðast fáir þingmenn hafa vitað af skýrslu Hagfræðistofnunar frá 2010. Af þeim þingmönnum sem blaðið hafði samband við könnuðust aðeins tveir við hana. Kristján L. Möller, sem var samgönguráðherra þegar skýrslan var unnin, og Steingrímur J. Sigfússon, efnahags- og viðskiptaráðherra, sem sagði að sig ræki minni til að vitað hefði verið um hana í tengslum við viðræður við lífeyrissjóðina um aðkomu þeirra að fjármögnun Vaðlaheiðarganga.